Hienierał-majoru Paŭłu Muraviejku 52 hady
Chto taki Pavieł Muraviejka?
Chto ŭ łukašenkaŭskim isteblišmiencie jastraby, a chto prahmatyki? Chto imkniecca publična pakazać Maskvie svaju «viernaść da śmierci», a chto, naadvarot, cicha pracuje na ŭmacavańnie niezaležnaści ci chacia b jaje elemientaŭ? Takija detali prajaŭlajucca ŭ asobnych vykazvańniach. Takim staŭ vypad hienierała Muraviejki ŭ adras Litvy.
Pavieł Muraviejka — pieršy namieśnik dziaržaŭnaha sakratara Rady biaśpieki Biełarusi. Jamu 52 hady.
Jon naradziŭsia ŭ Marjinaj Horcy. U 1992-m skončyŭ Minskaje vyšejšaje vajskova-palityčnaje ahulnavajskovaje vučylišča. Paśla Muraviejka pastupiŭ u minskuju Vajskovuju akademiju, jakuju skončyŭ u 2001-m. Praź niekalki hadoŭ vučyŭsia ŭ Rasii — u Akademii Hienštaba RF. Skončyŭ jaje ŭ 2008-m z załatym miedalom.
Pieršyja ŭznaharody znajšli Muraviejku ŭ 2010-m, u zvańni pałkoŭnika. U hetym hodzie jamu vydali miedal «Za biezdakornuju słužbu» II stupieni i «Za adznaku ŭ vajskovaj słužbie». Na hety momant jon zajmaŭ pasadu načalnika pieršaha ŭpraŭleńnia Hałoŭnaha vajskovaha ŭpraŭleńnia Hienštaba. U 2013-m jaho pastavili kiravać Hałoŭnym apieratyŭnym upraŭleńniem i dali hienieralskaje zvańnie.
U 2015-m Muraviejku adznačyli miedalom «Za biezdakornuju słužbu» I stupieni, a ŭ 2016-m — ordenam «Za słužbu Radzimie» III stupieni. U 2022-m hienierała pieraviali na pasadu pieršaha namieśnika dziaržaŭnaha sakratara Rady biaśpieki Biełarusi i vydali orden «Za słužbu Radzimie» II stupieni.
Pavieł Muraviejka raniej zajmaŭ pasadu ŭ Hienštabie. Ciapier jon pracuje ŭ Radzie biaśpieki
Jość u Muraviejki i rasijskaja ŭznaharoda. U 2019 hodzie rasijski pasoł Michaił Babič uručyŭ jamu orden Družby.
Palityk Pavieł Łatuška nazyvaŭ Muraviejku razam z hienierałam Alaksandram Valfovičam rasijskim łobi ŭ biełaruskim siłavym błoku.
U hienierała jość dačka, jakaja lubić padarožničać — najpierš u Jeŭropu.
«Ci ŭmiejuć biełarusy prymianiać jadziernuju zbroju»
Siarod apošnich hučnych zajaŭ Muraviejki — pahroza susiedziam jadziernaj zbrojaj. «U pieršuju čarhu chacieŭ by źbierahčy ad tych varjackich dumak i šalonych idej pravieryć na praktycy, ci ŭmiejuć biełarusy prymianiać hetu zbroju. U nas jość duch, vola i hatoŭnaść u vypadku nieabchodnaści ŭsimi srodkami abaraniać našu krainu», — skazaŭ jon dziaržaŭnym ŚMI ŭ vieraśni.
U tym ža vystupie jon zajaviŭ, što «za 2022-hi hod na infarmacyjnyja resursy Biełarusi było ździejśniena 320 miljonaŭ kibieratak», ale, maŭlaŭ, jość efiektyŭnyja miery supraćdziejańnia im. Heta vidavočnaja pamyłka, bo na ŭsiu Rasiju, zhodna z aficyjnymi źviestkami, za ŭvieś 2022-hi ździejśniena kala 50 tysiač kibieratak va ŭsich śfierach. Napeŭna, Muraviejka pabłytaŭ kibierataki z čymści inšym.
Pavieł Muraviejka. Fota: «Vajar»
Taksama hienierał zajaviŭ, što Biełaruś hatovaja da sumiesnych vajskovych vučeńniaŭ z Polščaj. «Kali palaki hatovyja z nami pravieści vučeńni, my z zadavalnieńniem vystupim z takoj inicyjatyvaj i razhledzim, jakija pytańni my možam adpracavać sumiesna», — kazaŭ jon.
A ŭ 2020-m Muraviejka adznačyŭsia inšaj zajavaj: Biełaruś pradkazała vajnu 2014 hoda va Ukrainie. «Padziei, jakija adbylisia ŭ susiedniaj Ukrainie, my sprahnazavali i acanili za dva hady da ich pačatku. Acaniŭšy, adkul moža zychodzić pahroza, my sprabujem minimizavać jaje na rańniaj stadyi», — śćviardžaŭ jon.
Paśla apošnich prezidenckich vybaraŭ Pavieł Muraviejka krytykavaŭ ruch za svabodnyja vybary i pierakonvaŭ, što łukašenkaŭskija siłaviki «abaranili Biełaruś». «Naš narod sa svaimi synami ŭ pahonach abaraniŭ Biełaruś. Razam z tym stała vidavočna, što niekatoryja ŭnutranyja faktary ŭ daktrynalnym dakumiencie niedaacenienyja. Havorka idzie pra źnižeńnie ŭ hramadstvie ŭzroŭniu patryjatyzmu», — kazaŭ jon. Pad patryjatyzmam łukašenkaŭcy zvyčajna majuć na ŭvazie łajalnaść dyktataru, zhodu na aŭtarytarnuju madel kiravańnia i zaležnaść Biełarusi ad Rasii.
Ciapier Muraviejka vyrašyŭ pahrazić litoŭcam kułakom. U Litvie adreahavali, zajaviŭšy, što heta surjozny znak taho, što sankcyi pracujuć. A siońnia ŭ Ministerstva zamiežnych spraŭ Litvy byŭ vyklikany časovy pavierany ŭ spravach Respubliki Biełaruś Jarasłaŭ Chmyl, jamu ŭručyli notu pratestu.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
