Novapryznačanyja pasły (źleva na prava): Ihar Maršałaŭ, Alaksandr Macukoŭ, Ihar Bieły, Raman Ramanoŭski, Siarhiej Malinoŭski, Alaksandr Čarviakoŭ: Fota: pres-słužba Łukašenki
Alaksandr Łukašenka pryznačyŭ pasłoŭ u Kitaj, Zimbabve, Paŭdniova-Afrykanskuju Respubliku, Sierbiju i Indanieziju.
Były supracoŭnik biełaruskaha MZS i palityčny analityk Pavieł Śluńkin ličyć, što heta zbolšaha «zvyčajnyja pryznačeńni karjernych dypłamataŭ» — za vyklučeńniem Kitaja i Zimbabve.
U Kitaj adpraŭleny Nadzvyčajnym i Paŭnamocnym Pasłom ministr ekanomiki Alaksandr Čarviakoŭ.
«Kali havaryć pra Čarviakova, to heta davoli raspaŭsiudžanaja praktyka — pryznačać u krainy, jakija ličacca stratehičnymi sajuźnikami, pasłami ludziej z vysokich pasadaŭ», — kamientuje pryznačeńnie byłoha ministra ekanomiki na dypłamatyčnuju słužbu ekśpiert.
Čarviakoŭ zamianiŭ Juryja Siańko, jaki ŭznačalvaŭ biełaruskaje dypłamatyčnaje pradstaŭnictva ŭ Piekinie z 19 listapada 2020 hoda. Raniejšyja pasady Siańko byli źviazanyja z mytnaj słužbaj.
Zamiena Siańko na Čarviakova adbyłasia nieŭzabavie paśla taho, jak Łukašenku nie zaprasili na treci forum «Pojas i šlach». Na dvuch papiarednich jon byŭ.
Da Juryja Siańko sa žniŭnia 2016 pa studzień 2020 hoda Nadzvyčajnym i Paŭnamocnym Pasłom Biełarusi ŭ Kitai byŭ Kirył Rudy. Da dypłamatyčnaj słužby jon zajmaŭ pasadu načalnika hałoŭnaha ekanamičnaha ŭpraŭleńnia Administracyi prezidenta i pamočnika Alaksandra Łukašenki pa ekanamičnych pytańniach.
Što da astatnich navapryznačanych kiraŭnikoŭ dypłamatyčnych misijaŭ, to Pavieł Śluńkin, nie biarecca tłumačyć, što staić za hetymi pryznačeńniami. «Dumaju, što za imi stajać rečy praktyčnyja i substantyŭnyja, ale adsutničaje niejkaja palityčnaja łohika», — zaŭvažaje jon.
Na jaho pohlad, «da 2020 hodu ŭsie hetyja słužboŭcy pajechali b ambasadarami ŭ jeŭrapiejskija stalicy, a ciapier adpraŭlenyja ŭ inšyja krainy».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Kirył Rudy nazvaŭ piać pryčyn, čamu reform nie budzie (u Biełarusi ŭ 2016 hodzie)
Łukašenka nazvaŭ ministra abarony Kitaja «samaj miedyjnaj piersonaj śvietu»
Biełaruskaja ekanomika pajšła ŭ rost, ale «mabilizacyjnyja padychody» zachavajucca
