«Dziela ŭsiaho čałaviectva» / For All Mankind
Žanr: navukova-fantastyčnaja drama
Premjera 4-ha siezona adbyłasia 10 listapada na Apple TV+
Maša Maškova i Džoeł Kinaman u sieryjale «Dziela ŭsiaho čałaviectva». Fota: Apple TV+
U pieršym siezonie šou stvaralniki zadali prostaje pytańnie: što, kali b SSSR vysadziŭsia na Miesiacy raniej za ZŠA?
Padziei ž čaćviortaha siezona pačali dahaniać sučasnaść: hledačy ŭžo nie ŭ 90-ch, a ŭ 2003 hodzie, jaki ŭ mnohich adnosinach vyhladaje tak, jak moh by vyhladać naš 2023-ci.
Asnoŭnyja etapy kaśmičnych palotaŭ u hetym śviecie tolki častkova abumoŭlenyja technałahičnymi dasiahnieńniami. Niaŭdačy i kanflikty na Marsie i ŭ inšych miescach na sto adsotkaŭ strymlivajucca hieapalitykaj, ekanomikaj i, viadoma, ehacentryzmam kankretnych ludziej.
«Karona» / The Crown
Žanr: bijahrafičnaja histaryčnaja drama
Premjera 6-ha siezona adbyłasia 16 listapada na Netflix
U pieršych čatyroch sieryjach finalnaha siezona asnoŭnaja ŭvaha nadajecca apošnim dniam žyćcia pryncesy Dyjany i nastupstvam jaje śmierci, u vyniku jakich reputacyja Lizaviety II i karaleŭskaj siamji akazałasia pad pahrozaj. Fota: Netflix
Na Netflix 16 listapada adbyłasia premjera pieršych čatyroch sieryj šostaha i apošniaha siezona papularnaha sieryjała «Karona». Šou raspaviadaje pra žyćcio i praŭleńnie karalevy Vialikabrytanii Lizaviety II, a taksama ŭsioj karaleŭskaj siamji.
Hałoŭnaj hierainiaj čatyroch premjernych sieryj stała Ledzi Dzi. Epizody pakazvajuć žyćcio Dyjany napiaredadni katastrofy, jakaja adbyłasia 31 žniŭnia 1997 hoda, a taksama niejki čas paśla zdareńnia (sama avaryja nie pakazvajecca).
Apošnija šeść sieryj «Karony» vyjduć 14 śniežnia, i ŭ ich možna budzie ŭbačyć viasielle prynca Čarlza (ciapierašniaha karala Karła III) i jaho daŭniaj kachanaj Kamiły Parkier-Boŭłz, a taksama znajomstva prynca Uiljama i Kiejt Midłtan.
«Džulija» / Julia
Žanr: bijahrafičnaja kamiedyjnaja drama
Premjera 2-ha siezona adbyłasia 16 listapada na Mach
Na miescy 1000-hadovaha francuzskaha fiermierskaha rynka, ad jakoha mała što zachavałasia, stvaralniki filma pabudavali ŭłasny rynak, kab hierainia mahła rabić tam pakupki. Fota: Siebaśćian Honan / Max
U centry pryznanaha krytykami sieryjała, jaki debiutavaŭ na kanale Max (raniej HBO Max) viasnoj 2022 hoda, — amierykanka Džulija Čajłd, aŭtarka kulinarnaha biestsielera «Asnovy francuzskaj kuchni». Padčas žyvoha efiru pra svaju knihu Džulija, zamiest taho, kab abmiarkoŭvać vydańnie, hatuje amlet. Heta vielmi padabajecca kiraŭnictvu kanała i šmatlikim hledačam. Džulii robiać prapanovu — stvaryć i vieści novaje kulinarnaje šou «Francuzski šef-kuchar», jakoje źmienić vielmi mnohaje – i ŭ žyćci Džulii, i ŭ žyćciach mnohich amierykancaŭ.
U novym siezonie suśviet Džulii istotna pašyrajecca: u pieršych troch epizodach razam z mužam jany vypraŭlajucca na francuzskuju Ryŭjeru i ŭ Paryž. Šou praciahvaje spałučać svoj firmovy humar z praniklivymi kamientarami pra toje, što značyć być žančynaj za 50 i pry hetym umieć atrymlivać ad žyćcia asałodu. Akramia ŭłasna hatavańnia, Džulija i jaje kamanda musiać aryjentavacca ŭ palityčnym paradku dnia, bo jany viaduć hramadskaje telebačańnie i supraćstajać šmatlikim sacyjalnym prablemam.
«Farha» / Fargo
Žanr: čornaja kamiedyja, kryminalnaja drama
Premjera 5-ha siezona 21 listapada na FX
Džuna Tempł u piatym siezonie «Farha». Fota: Mišel Fej / FX
Chatniaja haspadynia Dot Łajan ź Miniesoty (Džuna Tempł) viadzie spakojnaje i cichaje žyćcio. Jaje muž jaje abahaŭlaje. Ich dačka-padletak — heta ceły śviet dla Dot. Adzinaj vidavočnaj pieraškodaj na šlachu da ščaścia možna ličyć napyšlivuju śviakruchu — uładalnicu najbujniejšaha ŭ Amierycy ahienctva pa spahnańni daŭhoŭ. Jana pierakananaja, što matyvy Dot, jakaja vyjšła zamuž za jaje chłopčyka, byli daloka nie čystyja. Ale adnojčy na parozie doma Łajanaŭ źjaŭlajecca para hałavarezaŭ, kab paciahnuć Dot nazad u chvaravitaje minułaje, pra jakoje žančyna nikoli nie raspaviadała svajoj siamji. Adnak jana nie zdasca tak prosta.
«Hulnia ŭ kalmara: Vyprabavańnie» / Squid Game: The Challenge
Žanr: realici-šou
Premjera 22 listapada na Netflix
Pierajści rysu… «Hulnia ŭ kalmara: Vyprabavańnie». Fota: Netflix
Paśla hrandyjoznaha pośpiechu «Hulni ŭ kalmara», pieršapačatkova zapłanavanaha jak mini-sieryjał, stała jasna, što šou praciahniecca. Kažuć, što Chvan Don Chiok vypuścić druhi siezon u 2024 hodzie.
Kab fanaty prajekta nie zasumavali, u Netflix vyrašyli źniać realici-šou pa matyvach historyi. Hledačy ŭbačać surovyja vyprabavańni, napružanuju baraćbu i vialiki pryzavy fond: 456 hulcoŭ z usiaho śvietu spaborničajuć za 4,56 miljona dalaraŭ.
Stvaralnik sieryjała Chvan Don Chiok naviedaŭ zdymačnuju placoŭku i daŭ šou svoj dazvoł. Kamanda sprytna ŭvasobiła jaho ŭ žyćcio, praŭda, nie ŭziała pad uvahu antykapitalistyčny pasył režysiora. Aryhinalnaja «Hulnia ŭ kalmara» — drama pra darosłych u rospačy, jakija hulajuć u dziciačyja hulni sa śmiarotnymi nastupstvami, — była satyraj na ekspłuatatarskija realici-šou.
Dalokija ŭzhorki / Faraway Downs
Žanr: viestern, pryhodnicki film, film pra kachańnie
Premjera 26 listapada na Hulu, Star+ i Disney+
Nikol Kidman i Chju Džekman u filmie Baza Łurmana «Aŭstralija» 2008 hoda. Režysior pierarabiŭ hety 165-chvilinny film u pašyrany šaścisieryjny telesieryjał pad nazvaj «Dalokija ŭzhorki». Fota: Maximum Film / Alamy
Dziejańnie sieryjała adbyvajecca napiaredadni Druhoj suśvietnaj vajny ŭ paŭnočnaj Aŭstralii. Sara Ešli atrymała ŭ spadčynu ad muža vielizarnaje ranča i vialikija statki bujnoj rahataj žyvioły. Pakolki jana žančyna, miascovyja zavodčyki ŭpeŭnienyja, što lohka adbiaruć u jaje ŭłasnaść. Adnak Sara nie zdajecca: jana znajomicca ź niazhrabnym pahonščykam žyvioł Drovieram i ź jaho dapamohaj zrobić usio, kab zachavać ranča.
Fonam pakazana chvaravitaja i niapeŭnaja historyja kantaktaŭ biełych pryšelcaŭ z karennym nasielnictvam Aŭstralii.
Bolš pra kino:
