Ilustracyjnaja vyjava. Fota: D-Keine / Getty Images
Funkcyja hałasavych znosin z ChatGPT, jakaja raniej była tolki ŭ karystalnikaŭ płatnaj viersii niejrasietki, ciapier dastupnaja dla ŭsich žadajučych i nie patrabuje anijakaj apłaty.
Skarystacca novaj funkcyjaj pakul možna tolki ŭ aficyjnym mabilnym dadatku ChatGPT ad OpenAI u internet-kramach Google Play i App Store (spasyłki pakidajem tut: ChatGPT dla Android, ChatGPT dla IOS). Novym karystalnikam paśla spampoŭki treba budzie zarehistravacca ŭ dadatku, kab mieć dostup da ŭsich funkcyj niejrasietki, uklučajučy hałasavuju.
Hałasavy ChatGPT, jak i zvyčajny tekstavy varyjant štučnaha intelektu (ŠI), vykarystoŭvaje viersiju GPT-3.5 i nie moža samastojna šukać infarmacyju ŭ internecie, vałodajučy danymi tolki da pieryjadu studzienia 2022 hoda.
Štučny intelekt maje 37 asnoŭnych pieradustalavanych moŭ dla razmovy, siarod jakich niama biełaruskaj, ale niejrasietka ŭsio roŭna moža vyznačać biełaruskuju movu na słych i taksama adkazvać pa-biełarusku, bo ŭ jaje zahružali biełaruskamoŭnyja teksty ź internetu.
«Naša Niva» pratestavała hałasavuju funkcyju ChatGPT i pasprabavała pahavaryć z ŠI na biełaruskaj movie. Vyniki takija.
- ChatGPT padčas razmovy robić rehularnyja pamyłki pry pastanoŭcy naciskaŭ u słovach i pry hetym moža ŭžyvać ruskija słovy u biełaruskim styli. Naprykład, fraza «jana vymušana źjechać» była vymaŭlena niejrasietkaj tak: «jana vynuždienaja źjechać».
- Niezaležna ad abranaha hołasu niejrasietki, taja prymudrajecca razmaŭlać na biełaruskaj adnačasova i z anhlijskim, i z polskim, i z ukrainskim akcentami.
- Časam štučny intelekt błytaje padziei i asoby, pra jakija jaho pytajucca.
Ale pry hetym niejrasietka zdolnaja samanavučacca i pastupova vypraŭlać svaje pamyłki, asabliva kali vy sami na ich pakazvajecie padčas razmovy. U cełym, kali nie aceńvać hałasavuju funkcyju tolki pa zdolnaści havaryć na biełaruskaj, ChatGPT vydatna razmaŭlaje na pradustalavanych movach, i časam zdajecca, što hutarka idzie nie z robatam, a z sapraŭdnym čałaviekam.
Dla taho, kab prasłuchać ŭsie varyjanty hołasu niejrasietki i vybrać toj, jaki vam spadabaŭsia, nieabchodna zrabić nastupnyja kroki.
1) Z hałoŭnaha ekrana čata pierajdzicie ŭ bakavuju panel.
2) Paśla hetaha znajdzicie ŭnizie sprava ad nazvy vašaha akaŭnta značok naładaŭ i naciśnicie na jaho.
3) Dalej adkryvajecca mieniu naładaŭ, dzie možna abrać hołas niejrasietki va ŭkładcy Voice.
4) Źjaŭlajecca čornaje mieniu, dzie dastupny 5 varyjantaŭ hołasu ChatGPT (dva žanočyja i try mužčynskija) z roznaj tanalnaściu. Abiarycie toj, jaki vam spadabaŭsia, i viartajciesia ŭ hałoŭny čat, dzie dla razmovy ź niejrasietkaj nieabchodna nacisnuć na značok sa słuchaŭkami (hladzicie pieršy skrynšot).
Novaje abnaŭleńnie niejrasietki vyjšła jakraz u momant zakančeńnia surjoznaha kryzisu ŭ OpenAI, jaki moh pryvieści da poŭnaha raspadu kampanii i značnych prablem u pracy ChatGPT.
Reč u tym, što rada dyrektaraŭ kampanii dniami raptam vyrašyła zvolnić svajho kiraŭnika Sema Altmana, jaki ŭdzielničaŭ u raspracoŭcy niejrasietki. Hetaje rašeńnie vyklikała rezkuju niezadavolenaść siarod bolšaści supracoŭnikaŭ i fundataraŭ OpenAI, jakija pryhrazili masava syści ŭśled za Altmanam. Adnak ŭsio abyšłosia, bo Altmana ŭhavaryli viarnucca nazad.
Taksama nahadajem, što nie varta całkam spadziavacca na adkazy i vyniki, jakija daje ChatGPT. Technałohija schilnaja da «halucynacyj», jakija mohuć pryvieści da łžyvych zajaŭ, drennaj kantekstnaj łohiki i inšych chibnych vynikaŭ, jakija nie zasłuhoŭvajuć davieru. ChatGPT časam bolš karysny ŭ jakaści zychodnaha punkta dla zadačy, čym dla atrymańnia kančatkovych adkazaŭ, i moža dapamahčy ŭ vykanańni tvorčych abaviazkaŭ, dzie dakładnaść nie takaja važnaja.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«150 filmaŭ za siekundu». U Kitai zapuścili najchutčejšy internet u śviecie
Štučny intelekt upieršyniu zaklučyŭ biznes-kantrakt pamiž dźviuma firmami biez udziełu čałavieka
