Siarhiej Sparyš. Fota: «Radyjo Svaboda»
Izalatar, praca na ačystcy dratoŭ, samaadukacyja. Voś što było viadoma pra paplečnika Mikałaja Statkieviča, aktyvista «Narodnaj hramady» Siarhieja Sparyša, jaki jašče ŭ červieni 2020 hoda trapiŭ za kraty i praz hod apynuŭsia ŭ kałonii № 22 pad Ivacevičami, dzie adbyvaje pakarańnie ŭ 6 hadoŭ pazbaŭleńnia voli. Daśviedčanaja krynica raskazała «Svabodzie» pra źmieny ŭ žyćci viadomaha palitviaźnia za kratami.
«Pracavaŭ na abdzirańni dratoŭ, a ciapier vučycca na malara-tynkara», — paviedamiŭ surazmoŭca. Da źniavoleńnia Siarhiej Sparyš pracavaŭ zvarščykam na Mienskim zavodzie kołavych ciahačoŭ, kudy ŭładkavaŭsia, kali pakinuŭ kansiervatoryju. Tam jon vučyŭsia na kampazitara i napisaŭ simfoniju, ale rasčaravaŭsia ŭ muzycy i ŭładkavaŭsia na zavod. Kab być, jak jon kazaŭ, «bližej da narodu».
Pra ciapierašni nastroj Siarhieja krynica kaža hetak:
«Trymajecca, zastajecca ŭ dobrym humory, nastroj narmalny. Šmat čytaje i piša. Užo nie adzin hod piša vialikuju pracu pa historyi. Jašče praciahvaje vyvučać francuzskuju i ŭdaskanalvaje niamieckuju movu. Vynik dobry, kali mierkavać pa tym, što jon pračytaŭ «Zamak« Kafki na movie aryhinału, to-bok pa-niamiecku».
Pavodle krynicy, Siarhieju Sparyšu ŭdajecca pieradavać zamoŭlenyja knihi, choć «časam banderoli jamu nie vydajuć».
«Prykmietna schudnieŭ. Asabliva na zdaroŭje nie skardzicca, ale ŭ jaho prablemy z zubami, jakija tam vyrašyć składana. Jamu dachodziać praduktovyja pasyłki, tamu maje mahčymaść padsiłkavacca», — raskazała krynica.
Pavodle krynicy, suviaź ź Siarhiejem Sparyšom nierehularnaja.
«Byvaje, što doŭha niama zvankoŭ i listoŭ, ale potym maŭčańnie pieraryvajecca. Voś niadaŭna byŭ karotki zvanok».
Jašče da 2020 hoda aktyvista «Narodnaj hramady» Siarhieja Sparyša šmat razoŭ zatrymlivali na apazicyjnych akcyjach. Jaho zatrymali za paŭtara miesiaca da vybaraŭ, 25 červienia 2020 hoda.
U 2021 hodzie jaho sudzili pa tak zvanaj spravie telehram-kanała «Armija s narodom» i pryznali vinavatym pavodle troch artykułaŭ Kryminalnaha kodeksa, u tym liku 191-ha (pieraškoda ažyćciaŭleńniu vybarčych pravoŭ). Ahułam prysudzili šeść hadoŭ kałonii ŭzmocnienaha režymu.
Hety artykuł byŭ vystaŭleny aktyvistu za krytyčnyja vykazvańni ŭ adras staršyni Centrvybarkama Lidzii Jarmošynaj, jakuju šmat chto ličyć adkaznaj za falsifikacyi vybaraŭ u Biełarusi. Svajoj viny ni pa adnym z abvinavačańniaŭ Siarhiej Sparyš nie pryznaŭ. Biełaruskija pravaabaroncy pryznali Sparyša palitviaźniem.
Čytajcie taksama:
Mikołu Statkieviča praciahvajuć łamać
Palitviazień-žurnalist Aleś Lubiančuk pakutuje ŭ kałonii ad chvaroby chrybta
