Ilustracyjnaje fota: AP Photo / Larry Crowe
Ślady pioraŭ, ślizi abo brudu jašče paŭstahodździa tamu vyklikali nieabchodnaść myć kurycu pierad hatavańniem, ale ŭ naš čas miasa ptuški papiarednie myjuć na miasakambinacie ci ptuškafabrycy pierad upakoŭvańniem. Tym nie mienš, łahičnaj vyhladaje dumka, što my pavinny pamyć kurycu, kab vydalić niebiaśpiečnyja mikraarhanizmy, jakija ŭtrymlivajucca na pavierchni syroha miasa.
Siarod inšych, kuryca naturalnym čynam pieranosić Salmonella i Campylobacter — bakteryi, što mohuć vyklikać vielmi surjoznyja infiekcyi. Dzieci, pažyłyja ludzi, ciažarnyja žančyny i ludzi ź inšymi zachvorvańniami abo słabaj imunnaj sistemaj najbolš uraźlivyja pierad hetymi bakteryjami. Ale navat zdarovym ludziam Salmonella i Campylobacter pahražajuć špitalizacyjaj i śmierciu.
Ale ž myćcio kurycy pierad hatavańniem nie źniščaje mikrobaŭ ź miasa. Maksimum, heta moža tolki zmyć častku bakteryj z pavierchni. Ale hetaja praktyka na samaj spravie istotna pavialičvaje ryzyku zaražeńnia syroj kurycaj, bo patencyjna moža vyklikać raspaŭsiudžvańnie chvarobatvornych mikraarhanizmaŭ, zmytych z kurynaj skury, pa vašaj kuchni, piša The Conversation.
Kali syraja kuryca traplaje pad kran, bakteryi ź jaje skury razam sa strumieniem vady trapiać na vašu rakavinu, a časam z pyrskami i na susiednija šafki dy stojki dla posudu. Pyrski ž latuć da 80 sm.
I navat kali vy pramyjecie rakavinu vadoj paśla myćcia kurycy, hetaha moža być niedastatkova dla vydaleńnia ŭsich chvarobatvornych bakteryj, jakija raźlacielisia pa jaje pavierchni.
Varta taksama adznačyć, što marynavańnie ptuški taksama nie zrobić jaje bolš hihijeničnaj: daśledavańni pakazali, što hety mietad nie zabivaje, naprykład, salmaniełu. Inšyja daśledavańni pakazvajuć, što kolkaść Campylobacter moža być źmienšana paśla marynavańnia ŭ vocacie abo cytrynavym soku, ale i heta tolki tady, kali miasa pralažyć u marynadzie 24 hadziny.
Biaśpiečnaje abychodžańnie z syroj kurycaj
Jość šmat prostych krokaŭ, jakija vy pavinny vykanać pry hatavańni ptuški, kab zaścierahčysia ad chvarob charčovaha pachodžańnia.
Upakoŭka, u jakoj pastaŭlajecca syraja ptuška, časta zaražanaja bakteryjami. Adkryŭšy ŭpakoŭku i vyniaŭšy kurycu, padbajcie, kab źmieściva nie kapała na padłohu kuchni i inšyja pavierchni. Pakolki myćcio stvaraje niepatrebnuju ryzyku spadarožnaha zaražeńnia, to pry nieabchodnaści — kali na pavierchni kurycy jość brud abo śliź, abo kali kuryca mokraja — prosta vytrycie ich papiarovym ručnikom. Paśla hetaha ručnik vykińcie.
Režcie kurycu na čystaj došcy. Kali reštki miasa vypadkova trapili na inšyja pracoŭnyja pavierchni, vytrycie ich papiarovym ručnikom, a zatym ačyścicie pavierchniu antybakteryjalnym sprejem. Hetak ža, kali vy bieraciesia rukami za kurycu i za salnicu ci pieračnicu, nie zabudźciesia ich paśla pracierci antybakteryjalnym srodkam.
Paśla pracy ź miasam vymyjcie ruki z myłam i ciopłaj vadoj. Pryčym trymać ruki ŭ myle treba nie mienš za 20 siekund.
Adziny sposab źniščyć mikroby i zrabić ježu biaśpiečnaj dla ŭžyvańnia — pryhatavać jaje. Hatavańnie ptuški pry pravilnaj tempieratury i na praciahu patrebnaha času vielmi važna dla prafiłaktyki šmatlikich chvarob charčovaha pachodžańnia.
Čas i tempieratura buduć adroźnivacca ŭ zaležnaści ad taho, nakolki vialikaja vaša kuryca i jaki recept vy vykarystoŭvajecie, ale ŭ kožnym razie vaša kuryca pavinna dasiahnuć unutranaj tempieratury kala 75°C. Hetaja tempieratura efiektyŭnaja dla źniščeńnia bakteryjnych uzbudžalnikaŭ, uklučajučy salmaniełu i kampiłabaktar.
Najlepšy test — pravieryć sok z kurycy. Kali jon prazrysty i ŭ im nie bačna śladoŭ kryvi, to, napeŭna, kuryca hatovaja.
A niedasmažanuju kurycu ci lubuju inšuju ptušku (bačycie kroŭ, kali narazajecie miasa) nie varta jeści. Lepš jaje tady davaryć, dasmažyć ci dapiačy.
Čytajcie taksama:
Jak razmarozić kurycu i nie atrucicca?
Ekspres-test zmoža vyznačyć, ci jość u vašaj kurycy salmanieła
