Šmatdzietnaja maci ź Vierchniaj Pyšmy (Śviardłoŭskaja vobłaść, Rasija) pamierła paśla paviedamleńnia pra hibiel muža na vajnie. Pra heta E1.ru raspaviała rodnaja siastra 42-hadovaj Nadziei.
— Kamandzir, jaki znachodzicca ź im u zonie śpiecapieracyi (tak u Rasii nazyvajuć poŭnamaštabnaje ŭvarvańnie Rasii pa Ukrainu — NN), napisaŭ joj, što Hiena zahinuŭ. U jaje zdaryŭsia infarkt, ja adviezła jaje ŭ balnicu, daktary zrabili apieracyju, ale vyratavać nie zmahli. Na nastupny dzień paśla abiedu Nadzia zapluščyła vočy i serca spyniłasia, — raspaviała siastra žančyny Natalla.
Nadzieju pachavali 31 studzienia. A voś los jaje muža da hetaha času zastajecca zahadkaj. Sa słoŭ siastry pamierłaj žančyny, akramia paviedamleńnia ŭ WhatsApp, nijakich paćvierdžańniaŭ hibieli vajskoŭca dahetul niama.
— Hiena byŭ mabilizavany, paśla śmierci Nadziei mnie telefanavaŭ vajenkam, jaki adpraŭlaŭ jaho na SVO, i aburaŭsia, z čaho my naohuł vyrašyli, što Hiena miortvy. Niama takoj infarmacyi. Nijakich aficyjnych źviestak, — kaža siastra Nadziei. — Ja spadziajusia da apošniaha, što jon žyvy. Ja nie vieru, što jon zahinuŭ, što dzieci zastalisia biez baćkoŭ.
Nadzieja z Hienadziem razam vychoŭvali traich dziaciej. Dačce ŭžo 20 hadoŭ, jana vučycca ŭ inšym horadzie. A syny, starejšamu ź jakich — dzieviać, a małodšamu — piać, ciapier znachodziacca ź ciotkaj.
— My jaje jašče nie pachavali, a apieka ŭžo hrukała ŭ dźviery. Ale dziaciej ja nikomu nie addam. Nam treba zrazumieć, dzie ich tata, žyvy jon ci miortvy. I vyrašać pytańnie z apiakunstvam, — kaža Natalla. — Vy nie ŭjaŭlajecie, jakaja heta była siamja. Jak jana lubiła Hienu, heta słovami nie pieradać, a jon jaje prosta abahaŭlaŭ! U vieraśni, kali jon prychodziŭ u adpačynak, jany abviančalisia.
Deputat Dziarždumy Maksim Ivanoŭ u razmovie z E1.ru paabiacaŭ uziać situacyju na kantrol i ŭ pieršuju čarhu vyśvietlić status vajskoŭca, jakoha doma čakajuć maleńkija dzieci.
Čytajcie taksama:
Pry ŭdary pa piakarni ŭ Lisičansku zahinuŭ ministr pa nadzvyčajnych situacyjach «ŁNR»
Viarchuška MNS, prakurory, deputaty. Stała viadoma, čamu Ukraina ŭdaryła pa piakarni ŭ Lisičansku
