Siarhiej Ryžoŭ. Fota: viciebsk.cc
Chto taki Siarhiej Ryžoŭ
Siarhiej Ryžoŭ — małaviadomy aktyvist ź Viciebska. Jon nie znajšoŭ takuju palityčnuju siłu, jakaja b adpaviadała jaho pohladam, tamu pasprabavaŭ stvaryć jaje sam. Hetym i zapomniŭsia.
Ryžoŭ pazicyjanavaŭ siabie baraćbitom za sacyjalnuju spraviadlivaść, tradycyjnyja kaštoŭnaści, abjadnańnie słavianskich narodaŭ vakoł Rasii i pravasłaŭja. Byŭ praciŭnikam Łukašenki. Udzielničaŭ u mierapryjemstvach prarasijskich aktyvistaŭ.
Aśviačeńnie charčoŭ ź inicyjatyvy Siarhieja Ryžova (druhi sprava). Fota: sacyjalnyja sietki
Arhanizoŭvaŭ aśviačeńnie pravasłaŭnym śviatarom dziciačaha charčavańnia, ale kramy nie bralisia taki tavar pradavać.
U 2010-m Ryžoŭ, na toj momant rabotnik Viciebskaha płodaharodninaha kambinata, vyrašyŭ stać prezidentam. Tady rehistravali i žuka, i žabu, ale Ryžoŭ sa svaimi 112 siabrami inicyjatyŭnaj hrupy byŭ zanadta niesurjoznym, kab CVK damalavaŭ jamu patrebnyja podpisy.
Kali ž u Ryžova pradkazalna ničoha nie vyjšła, zajaviŭ ab stvareńni partyi «Biełaja Ruś». U dalejšyja hady jon prezientavaŭ siabie jak lidar hetaj niezarehistravanaj arhanizacyi.
Palityčnaja aktyŭnaść adrezała Ryžovu mahčymaść pracaŭładkavacca. Jon pryznavaŭsia, što viadzie napaŭhałodnaje isnavańnie i źbiraje miłaścinu. Praŭda, z nažabravanaha abiacaŭ dapamahać represavanym biełarusam.
Siarhiej Ryžoŭ žabruje kala viciebskaha pravasłaŭnaha chrama. Fota: sacyjalnyja sietki
U 2013 hodzie Ryžoŭ trapiŭ u vyćviareźnik, dzie na jaho skłali pratakoł za chulihanstva. Jamu pahražała 15 sutak aryštu, ale jon uciok u Rasiju. Zajaŭlaŭ, što ŭ vyćviareźniku jaho źbili supracoŭniki, a spravu sfabrykavali.
Jak trapiŭ za kraty
U tyja «travajednyja» časy prarasijskaja aryjentacyja aktyvistaŭ choć i ŭsprymałasia balesna, ale nie nastolki vostra, jak paśla akupacyi ŭ 2014 hodzie Rasijaj Krymu i raźviazańnia joju vajny na Danbasie dy ciapierašniaj vialikaj vajny va Ukrainie.
Tamu tady dzivactvy Ryžova byli pryciahalnaje dla žurnalistaŭ, niekatoryja pisali pra jaho jak pra achviaru režymu.
Sam ža Ryžoŭ zajaŭlaŭ, što va Ukrainie ŭdałosia «pabudavać nacyjanalizm ź vidavočnymi prykmietami nieafašyzmu» i strašyŭ padziełam Biełarusi.
Bolš za hod viciebski aktyvist nie abjaŭlaŭsia na radzimie, a pa viartańni zajaviŭ, što znoŭ pojdzie ŭ prezidenty.
Ale nieŭzabavie, u pačatku 2015 hoda, byŭ zatrymany pa abvinavačvańni ŭ seksualnym hvałcie nad biazdomnym mužčynam. Siłaviki ŭzhadali tuju samuju historyju z vyćviareźnikam, jakaja adbyłasia ŭ kancy 2013 hoda.
Siarhiej Ryžoŭ vystupaje na Słavianskim maršy u Mahilovie. Jaho arhanizavali prychilniki rasijskaha manarchizmu
Historyja była nakolki dzikaja, nastolki i absurdnaja. Videa z vyćviareźnika navat pakazvali ŭ telenavinach — na im Ryžoŭ ustaje sa svajho łožka i ŭkładvajecca na susiedni łožak da inšaha pjanaha.
Sudzili Ryžova na zakrytym pracesie. Hałoŭnym dokazam jaho viny ŭ seksualnym hvałcie byli tyja zdymki z kamiery nazirańnia ŭ vyćviareźniku. Svajoj viny ŭ sudzie Ryžoŭ nie pryznaŭ, a paciarpieły i nie źviartaŭsia z zajavaj ab hvałcie.
Asudzili Ryžova da 6,5 hoda kałonii strohaha režymu.
Ryžoŭ adbyvaŭ pakarańnie ŭ Mahiloŭskaj kałonii №15. Artykuł, pavodle jakoha aktyvist trapiŭ za kraty, nie pakidaje sumnievu, što jon moh atrymać «nizki sacyjalny status». I adpaviednaje staŭleńnie da jaho z boku inšych viaźniaŭ.
Praciahły čas pra los Ryžova kłapaciŭsia lekar Ihar Pasnoŭ, jakoha žurnalisty nazyvali psichijatram-praŭdarubam. Jon źbiraŭsia stać davieranaj asobaj Ryžova na vybarach 2015 hoda. Miedyk prasiŭ administracyju kałonii, kab Ryžova pieraviali ŭ viaźnicu bližej da Viciebska, u jakim žyła jaho maci.
U adkazie turemščyki adpisali, što pahroz žyćciu i zdaroŭju źniavolenaha nie isnuje.
Kali pravaabaroncy admovilisia pryznavać Ryžova palitviaźniem, Pasnoŭ abazvaŭ ich «kudłami KDB». U 2019 hodzie Pasnovu dali try hady «chimii» za paklop na prakurora. Z taho času jon nie abjaŭlajecca ŭ sietkach, dzie raniej byŭ duža aktyŭnym.
Pra Ryžova časta pisaŭ žurnalist «Viciebskaha kurjera» Uładzimir Žyhułoŭ, jaki pamior u 2017 hodzie. Tak abarvaŭsia jašče adzin łancužok suviazi z hramadstvam.
Ryžoŭ maje dačku, jakoj ciapier 24 hady. Z žonkaj jon u razvodzie. Maci pamierła. Sioleta ŭ Ryžova byŭ jubilej — jamu spoŭniłasia 60 hadoŭ.
«Moža, i nie mieŭ nizki sacyjalny status»
Pra vyzvaleńnie Siarhiej Ryžoŭ napisaŭ sam u sacyjalnych sietkach 19 vieraśnia 2021 hoda. Jon całkam adbyŭ pryznačanaje pakarańnie — asudžanych za seksualnyja złačynstva amal nikoli nie adpuskajuć umoŭna-daterminova.
«Žyvy, ščaślivy, znoŭ na voli! Rady žyćciu i mahčymaści dychać. Rady ŭsim, ale bačyć hatovy nie kožnaha…» — adznačyŭ jon.
Apošni jaho post u fejsbuku datujecca 1 listapada 2021 hoda.
«Asnoŭnaja praca čarciej — pierakonvać nasielnictva piekła, što jany žyvuć u rai…», — napisaŭ jon i prapaŭ.
Viciebski pravaabaronca, jaki pažadaŭ zastacca ananimnym, raskazaŭ, što pa vyzvaleńni Ryžoŭ paprasiŭ dapamohi ŭ składańni zajavy ŭ mižnarodnyja sudovyja orhany pa pravach čałavieka. Jamu pieraličyli, jakija dakumienty nieabchodnyja dla hetaha.
Paśla hetaha Ryžoŭ bolš na suviaź nie vychodziŭ.
«Navat nie viedaju, što rabić, kab vyjści na jaho śled. Patrebny čałaviek, jaki moh by padać jaho ŭ vyšuk i atrymać adkaz. Heta musić być svajak. Moža, jon doma cichieńka žyvie ci padaŭsia ŭ manastyr», — razvažaje pravaabaronca.
Siarhiej Ryžoŭ 2012 hod. Fota: sacyjalnyja sietki
Surazmoŭcu davodziłasia znajomicca ź niekatorymi materyjałami spravy Ryžova i jon dapuskaje, što svaim učynkam u vyćviareźniku aktyvist prosta prasiŭsia ŭ tualet, a supracoŭniki ŭhledzieli ŭ tym seksualnaje biasčynstva.
Pravaabaronca spadziajecca, što ŭ niavoli ŭ Ryžova była mahčymaść davieści inšym asudžanym, što jaho sprava sfabrykavanaja. A asudžanyja sa stažam mahli ŭbačyć u prysudzie praŭdzivaść jaho słovaŭ i nie rabić palityka izhojem.
«Moh stać achviaraj kanfliktu»
Na dumku pravaabaroncy, paśla vyzvaleńnia Ryžoŭ moh nie adrazu zrazumieć, što adbyvajecca ŭ krainie. Nie vyklučana, što jaho mahli znoŭ pasadzić, ale za dva hady ŭ takim vypadku situacyja z Ryžovym prajaśniłasia b.
«My nie možam viedać, u jakim psichałahičnym i dušeŭnym stanie jon vyjšaŭ na volu. Ja nie čuŭ jaho hołasu, kab vyznačyć, što ź im», — adznačaje jon.
Najbolš vierahodny varyjant, što Ryžoŭ źjechaŭ u Rasiju.
«Uličvajučy jaho praŭdalubstva, staŭleńnie da niespraviadlivaści… Kažu sa stracham — ale jon moh zhinuć. Heta nie aznačaje, što jon zahinuŭ ad ruk supracoŭnikaŭ palicyi. Moh zahinuć na bytavym uzroŭni. Stać achviaraj kanfliktu, naprykład. Ale šukać jaho faktyčna niama kamu», — havoryć surazmoŭca.
Siarhiej Ryžoŭ. Ilustracyjnaje fota: sacyjalnyja sietki
Ryžoŭ byŭ nietypovym, niesistemnym apazicyjanieram, u jakoha nie było nijakaj kamandy i nijakich resursaŭ. Zrešty, pry jaho antybiełaruskich pohladach było b niaprosta znajści sabie paplečnikaŭ.
Z hramadzianskaha aktyvizmu Ryžoŭ vyrašyŭ pajści ŭ palityku, ale pry adsutnaści sacyjalnych liftaŭ u krainie tak i nie znajšoŭ nijakaj mahčymaści realizavać siabie. Suvory prysud pastaviŭ kryž na ŭsich jaho pierśpiektyvach. Vyhladaje, Ryžoŭ tak i nie zdoleŭ viarnucca da raniejšaha žyćcia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
«Chtości za joj staić». Čamu čynoŭniki słuchajucca Bondaravu
«Słava Rasii»: na Słavianski marš u Mahilovie sabrałasia 20 čałaviek
Čym biełaruski aficer adroźnivajecca ad rasijskaha?
Biełaruś i Rasija stvaryli kamisiju dla «abarony histaryčnaj praŭdy»
My jeŭrapiejcy ci jeŭrazijcy? Marzaluk uzbałamuciŭ łukašysckija telehram-kanały
