AP Photo
Jon zahinuŭ razam sa svaim trenieram, ruandyjcam Žerviezam Chakizimanam, na darozie na zachadzie Kienii ŭ niadzielu.
Kiptum ździejśniŭ praryŭ u 2023 hodzie, staŭšy hałoŭnym supiernikam suajčyńnika Eliuda Kipčohie — adnaho z najvialikšych marafoncaŭ u śviecie. A ŭ kastryčniku minułaha hoda ŭ Čykaha jon pabiŭ dasiahnieńnie Kipčohie, pieraadoleŭšy dystancyju 42 km za dźvie hadziny i 35 siekund.
Abodva spartsmieny byli ŭklučanyja ŭ papiaredni skład zbornaj Kienii pa marafonie dla ŭdziełu ŭ Alimpijskich hulniach u Paryžy ŭ kancy hetaha hoda.
Addajučy daninu pamiaci Kiptumu, ministr sportu Kienii Ababu Namvamba napisaŭ u X: «Žachliva baluča!!! Kienija straciła asablivuju žamčužynu. U mianie niama słoŭ».
Lidar kienijskaj apazicyi i były premjer-ministr Raiła Adynha zajaviŭ, što kraina straciła «sapraŭdnaha hieroja» i smutkuje pa «vybitnaj asobie… i ikonie kienijskaj lohkaj atletyki».
Siebaśćian Kou, prezident Suśvietnaj asacyjacyi lohkaj atletyki, skazaŭ, što Kiptum byŭ «nievierahodnym spartsmienam, jaki pakinuŭ nievierahodnuju spadčynu».
Avaryja adbyłasia ŭ niadzielu kala 23:00 pa miascovym časie.
Kiptum byŭ za rulom, kali aŭtamabil straciŭ kiravańnie i pierakuliŭsia, u vyniku čaho abodva zahinuli na miescy.
Pradstaŭnik palicyi dadaŭ, što treci pasažyr — žančyna — atrymała traŭmy i była ekstrana dastaŭlena ŭ balnicu.
U Kiptuma zastalisia dvoje dziaciej.
Na minułym tydni kamanda Kiptuma abviaściła, što na marafonie ŭ Raterdamie jon pasprabuje prabiehčy marafonskuju dystancyju mienš čym za dźvie hadziny — takoha vyniku jašče nikomu nie ŭdavałasia dasiahnuć u adkrytym spabornictvie.
Słava pryjšła da jaho imkliva — svoj pieršy poŭny marafon jon prabieh tolki ŭ 2022 hodzie.
Jon adrazu ž zajaviŭ pra siabie na dystancyi, vyjhraŭšy marafon u Valensii (2:01:53), staŭšy na toj momant čaćviortym pa chutkaści ŭ historyi, a zatym ustanaviŭ rekord trasy (2:01:25) na Łondanskim marafonie ŭ krasaviku 2023 hoda.
Praz šeść miesiacaŭ, usiaho tolki ŭ svaim trecim zabiehu, Kiptum razam źniaŭ 34 siekundy z suśvietnaha rekordu ŭ Čykaha. Heta spabornictva stała dla jaho apošnim.
Fota: Alberto Pezzali / AP
Jon užo adtačyŭ svoj taktyčny padychod, zhodna ź jakim jon bieh z hrupaj na praciahu 30 km, a zatym pavialičvaŭ temp i vychodziŭ na dystancyju samastojna na apošniaj častcy maršrutu.
Kiptum udzielničaŭ u svaim pieršym bujnym spabornictvie ŭ 2018 hodzie, biehajučy ŭ pazyčanych krasoŭkach, bo nie moh dazvolić sabie ŭłasnuju paru.
Jon staŭ adnym z novych kienijskich spartsmienaŭ, jakija pačynali karjeru na darohach, adarvaŭšysia ad raniejšaj tradycyi, kali spartsmieny pačynali na biehavoj darožcy, a zatym pierachodzili na bolš doŭhija dystancyi.
U minułym hodzie Kiptum raspavioŭ, što jaho niezvyčajny vybar byŭ abumoŭleny prosta niedachopam srodkaŭ.
«U mianie nie było hrošaj, kab jeździć na biehavyja treniroŭki», — patłumačyŭ jon.
Jaho trenier, 36-hadovy Chakizimana, byŭ u minułym ruandyjskim biahunom. Letaś jon niekalki miesiacaŭ dapamahaŭ Kiptumu ŭstalavać suśvietny rekord.
Ich adnosiny jak treniera i spartsmiena pačalisia ŭ 2018 hodzie, ale ŭpieršyniu jany sustrelisia, kali suśvietny rekardsmien byŭ našmat maładziejšy.
«Ja viedaŭ jaho, kali jon byŭ maleńkim chłopčykam, jaki basanož paśviŭ žyviołu» — uspaminaŭ Chakizimana ŭ minułym hodzie. — Heta było ŭ 2009 hodzie, ja treniravaŭsia pobač ź fiermaj jahonaha baćki, jon nastupaŭ mnie na piatki, a ja jaho adhaniaŭ. Ciapier ja ŭdziačny jamu za jaho dasiahnieńni».
