U Biełarusi pačałasia vakcynacyja suprać hrypu A (H1N1).
Jak paviedamiła zahadčyk adździaleńnia imunaprafiłaktyki Minskaha haradskoha centra hihijeny i epidemijałohii Iryna Hlinskaja, pieršyja pryščepki suprać novaha virusa byli zrobleny 5 studzienia ŭ niekatorych staličnych miedustanovach.
6 studzienia vakcynacyja pravodzicca ŭžo va ŭsich paliklinikach Minska.
Pryščepki robiacca rasijskaj vakcynaj «Influvir», jakaja pavinna być uviedziena dvuchrazova. Najpierš pryščepku atrymlivajuć rabotniki arhanizacyj achovy zdaroŭja i słužb, jakija zabiaśpiečvajuć ich bieśpierapynnaje funkcyjanavańnie žyćciova važnych sistem (MNS, transpart, ŽKH i inš.).
«Kali z prośbaj ab pryščepcy źviartajecca chtości, chto nie ŭvachodzić u hetu hrupu, my, jak praviła, imkniemsia nie admaŭlać — vakcyny pakul dastatkova»,
— adznačyła Hlinskaja.
Pavodle jaje słoŭ, vakcynacyja pravodzicca biaspłatna i praciahniecca da 1 lutaha.
Usiaho ŭ Minsku za košt srodkaŭ respublikanskaha biudžetu płanujecca pryščapić prykładna 60 tys. čałaviek.
Jak paviedamili ŭ adździele hihijeny, epidemijałohii i prafiłaktyki Ministerstva achovy zdaroŭja, u bližejšyja dni vakcynacyja suprać hrypu A (H1N1) pačniecca ŭ inšych haradach Biełarusi. Usiaho za košt srodkaŭ respublikanskaha biudžetu zakupleny 1 młn. doz «Influviru» dla vakcynacyi 500 tys. čałaviek.
Płanujecca taksama zakupić dadatkovuju kolkaść doz vakcyny suprać hrypu A (H1N1) za košt srodkaŭ miascovych biudžetaŭ. Zajaŭki na vakcynu prymaje Handlova‑vytvorčaje respublikanskaje ŭnitarnaje pradpryjemstva «Biełfarmacyja».
Pavodle apošnich źviestak Ministerstva achovy zdaroŭja, zaraz u Biełarusi zachvorvańnie na VRVI i hryp nižejšaje za epidemičny ŭzrovień.
