Chłopca Meryjem, jakoho zavuć Anton, paŭtara hoda tamu departavali ź Biełarusi za admovu ad dačy na jaje chłuślivych pakazańniaŭ, što nibyta srodki, atrymanyja ź jaje kancertu ŭ minskim bary «Banki-butyłki» ŭ žniŭni 2022 hoda, byli pieraličanyja na spansavańnie i finansavańnie Uzbrojenych sił Ukrainy. Nasamreč, jak śćviardžaje śpiavačka, sama jana vystupała na tym kancercie zadarma, a achviaravańni, zroblenyja ludźmi padčas jaje vystupleńnia, išli na dapamohu biazdomnym žyviołam.
Antona źbivali čatyry hubazikaŭcy, začyniŭšy ŭ kabiniecie, «da fijaletavych noh», a samu Meryjem u hety čas pasadzili kala dźviarej, kab jana ŭsio čuła. Urešcie vybić ničoha nie ŭdałosia, i na sudzie śpiavačcy heta abvinavačańnie nie stavili.
Chłopcu ž, jaki maje rasijskaje hramadzianstva, ale ź dzieviacihadovaha ŭzrostu žyvie ŭ Biełarusi, paśla «namalavali» čatyry zapar administracyjnyja parušeńni, za kožnaje ź jakich jon adsiadzieŭ pa 15 sutak. A kali hetyja dva miesiacy skončylisia, Antona adrazu adpravili ŭ aeraport i departavali ź Biełarusi na 10 hadoŭ.
Dziela taho Meryjem z Antonam nie mahli sustrakacca navat paśla taho, jak jaje vypuścili z turmy. Dziaŭčyna mieła try hady «chatniaj chimii» i zabaronu na vyjezd ź Biełarusi, a chłopiec nie moh u Biełaruś zajechać. Adnak adnosiny jany ŭvieś čas padtrymlivali. Spačatku Anton słaŭ Meryjem listy ŭ SIZA praź siabroŭ, a paśla para «hod prasiadzieła na telefonie».
Ciapier heta ŭsio ŭžo za plačyma, chłopiec ź dziaŭčynaj znoŭ razam, i 28 lutaha Anton zrabiŭ Meryjem prapanovu, jakuju jana pryniała.
Para znachodzicca ŭ Hruzii.
Čytajcie taksama:
Byłaja palitźniavolenaja śpiavačka Meryjem Hierasimienka vystupiła z kancertam u Varšavie
