Kałaž «Naša Niva»
Jak piša The Wall Street Journal, Kanhres ZŠA patraciŭ cełyja hady na abmierkavańnie taho, jak źmienšyć ryzyki nacyjanalnaj biaśpieki ad tyktoka, jaki źjaŭlajecca kitajskaj ułasnaściu. U ciapierašni čas kala 170 miljonaŭ amierykancaŭ vykarystoŭvajuć hety dadatak.
Na minułym tydni kamitet Pałaty pradstaŭnikoŭ Kanhresa ZŠA pa handli i enierhietycy adnahałosna zaćvierdziŭ zakonaprajekt, jaki patencyjna zdolny pryvieści da zabarony tyktoka ŭ hetaj krainie.
Kali tyktok nie admovicca ad svajoj kitajskaj matčynaj kampanii ByteDance, to amierykanskim kampanijam, u tym liku Apple i Google, budzie zabaroniena raspaŭsiudžvać hety dadatak praz svaje kramy i akazvać servisu pasłuhi chostynhu.
Urad ZŠA baicca, što kitajski ŭrad moža vykarystoŭvać papularnuju płatformu dla palityčnaha ŭpłyvu ŭ ZŠA.
Isnuje mnostva śviedčańniaŭ pra zahłušvańnie ŭ tyktoku adčuvalnaha dla Kitaja kantentu. Naprykład, paviedamleńniaŭ pra prymusovuju pracu ujhuraŭ u pravincyi Sińczian, raźni na płoščy Ciańańmeń, akcyjach pratestu ŭ Hankonhu i Tybiecie.
Razam z hetym na płatformie padtrymlivajucca paviedamleńni, jakija siejuć razład u amierykanskim hramadstvie. Naprykład, minułaj vosieńniu stała virusnym videa «List u Amieryku», napisanaje ŭ 2002 hodzie Asamam bin Ładenam. Akramia hetaha, na płatformie, jak pakazaŭ śniežański analiz Navukova-daśledčaha instytuta sietkavaha zaražeńnia (Network Contagion Research Institute), bolš videa, jakija padtrymlivajuć CHAMAS, čym u padtrymku Izraila.
Daśledčyki taksama adznačajuć značnyja adroźnieńni pamiž cheštehami ŭ instahramie i tyktoku. U adkaz na takuju zajavu ŭ studzieni kampanija abmiežavała im dostup da svaich cheštehavych danych.
Inšaja važnaja ryzyka, jakuju ŭjaŭlaje tyktok, — kibieršpijanaž. Jak ličać śpiecyjalisty, płatforma źbiraje kanfidencyjnuju infarmacyju amierykanskich karystalnikaŭ, u tym liku historyju pošuku, prahladu historyj i miescaznachodžańnia. I hetuju infarmacyju, pavodle ŭnutranaj pierapiski kampanii, jakaja pratačyłasia ŭ presu, bačać u Kitai.
Vydańnie adznačaje, što ŭ Kitai nie isnuje adroźnieńniaŭ pamiž dziaržaŭnymi i pryvatnymi kampanijami. U ByteDance pracujuć sotni supracoŭnikaŭ, jakija raniej pracavali ŭ dziaržaŭnych ŚMI. Były kiraŭnik inžyniernaha adździeła ŭ ofisach ByteDance u ZŠA śćviardžaŭ, što ŭ Kamunistyčnaj partyi Kitaja «byŭ śpiecyjalny ofis abo padraździaleńnie» ŭ kampanii, «časam zvany Kamitetam».
Kitajskaje zakanadaŭstva patrabuje, kab ByteDance vykonvaŭ patrabavańni Piekina pa nahladzie. Tamu niama nijakaha sposabu źmiakčyć ryzyki biaśpieki tyktoka, akramia prymusovaha prodažu.
Jak adznačaje vydańnie, amierykanskija inviestary vykazali zacikaŭlenaść u nabyćci tyktoka, choć aficyjny pradstaŭnik urada Kitaja ŭ minułym hodzie zajaviŭ, što zabłakuje prodaž.
U najbližejšy čas pavinna prajści hałasavańnie pa zakonaprajekcie ŭ Pałacie pradstaŭnikoŭ ZŠA. Jon daść prezidentu novyja paŭnamoctvy vyznačać płatformy, jakija ŭjaŭlajuć pahrozu nacyjanalnaj biaśpiecy. Heta tyčycca dadatkaŭ z bolš čym miljonam aktyŭnych karystalnikaŭ u hod, jakija znachodziacca pad kantrolem «zamiežnych złamyśnikaŭ».
Ale heta nie pieršy taki vypadak. Kamitet pa zamiežnych inviestycyjach u Złučanych Štatach prymusiŭ kitajskich uładalnikaŭ Grindr, dadatku dla znajomstvaŭ hiejaŭ, admovicca ad kantrolu nad kampanijaj.
Čytajcie jašče:
Jak pierachod pa spasyłcy abo prahlad čužoha profilu mohuć vas vydać u TikTok
«Jość znajomyja, jakija atrymlivajuć u tyktoku i 8 tysiač rubloŭ»
Jak nadziejna pačyścić akaŭnt u TikTok — padrabiazny hajd
Kitaj choča, kab štučny intelekt adlustroŭvaŭ asnoŭnyja kaštoŭnaści sacyjalizmu
