Kirmaš Kaziuki ŭ Vilni. Ilustracyjnaje fota: «Naša Niva»
Arhanizacyja Diversity development group razam ź Instytutam sacyjałohii litoŭskaha centra sacyjalnych navuk praviali apytańnie siarod žycharoŭ Litvy pra toje, jak jany staviacca da roznych uraźlivych hrupaŭ ludziej (asabliva mihrantaŭ). Apytanyja byli bolš za 1000 žycharoŭ Litvy, nie tolki ŭ haradach, ale i ŭ vioskach. Daśledčyki aceńvajuć pahrešnaść u +/— 3%.
Pieršaje pytańnie było pra toje, z kim litoŭcy nie chočuć žyć pobač. Siarod mihrantaŭ u hrupu ŭklučyli biełarusaŭ, ukraincaŭ i rasijan, a taksama «inšych mihrantaŭ».
Pobač ź biełarusami nie chacieli b žyć 18% litoŭcaŭ, jak i ź mihrantami ź inšych krainaŭ. Da ŭkraincaŭ staŭleńnie trochu lepšaje (12%).
Adčuvalna horš litoŭcy staviacca da ludziej ź psichičnymi razładami (65% nie chacieli b žyć ź imi pobač), hiejaŭ (54%) i musulman (46%). Za imi — rasijanie (36%) i ludzi, jakija nie razmaŭlajuć pa-litoŭsku (22%).
Nastupnym pytańniem było «Z kim vy nie chacieli b pracavać razam?».
Pobač ź biełarusami nie chacieli b pracavać tolki 12% litoŭcaŭ, na paru adsotkaŭ bolš — ź inšymi mihrantami. Abahnali biełarusaŭ tolki ŭkraincy — ź imi nie chacieła b pracavać 8% litoŭcaŭ.
Siarod antylidaraŭ — ludzi ź psichičnymi zachvorvańniami (suprać sumiesnaj pracy ź imi vykazalisia 61%) i hiei (40%). Ale na treciaje miesca vyjšaŭ moŭny faktar — 34% nie chacieli b pracavać z tymi, chto nie razmaŭlaje pa-litoŭsku i 33% — z rasijanami. Musulmanie pasiaredzinie śpisu (22%). Takim čynam, litoŭskaja mova vielmi važnaja dla litoŭcaŭ, asabliva ŭ pracoŭnych znosinach.
Z kim nie chacieli b žyć i pracavać litoŭcy. Danyja: Diversity development group
Siarod mihrantaŭ litoŭcy vielmi nieprychilna staviacca da tych, chto pierasiakaje miažu z parušeńniem zakonu (86% suprać taho, kab pakidać ich u Litvie). Da palityčnych biežancaŭ staŭleńnie źmiašanaje — kala 44% «za» i 47% «suprać». Pryčym ahułam kolkaść pryjezdžych vielmi turbuje litoŭcaŭ. 87% ličać, što ich usio bolej, a 79% — što ŭžo chopić.
Pry hetym staviacca jany da ich bolš-mienš narmalna: u pytańniach pra dapamohu biežancam bolšaść litoŭcaŭ ličać, što jany majuć prava na adukacyju dla dziaciej, miedycynu, jurydyčnyja pasłuhi i biaspłatnyja kursy litoŭskaj movy.
Admietna, što bolšaść litoŭcaŭ, zhodna z apytańniem, čuła pra mihrantaŭ tolki ź miedyja. Tolki 36% bačyli ci asabista znajomyja z ukrainskimi biežancami i 4% bačyli ŭžyvuju palityčnych uciekačoŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Chaču zrabić Paźniaka piersonaj non-hrata» — litoŭski aktyvist
Prablema «lićvinizmu» nie moža stać palityčnaj, bo biełarusam nie ciesna ŭ miežach svajoj krainy — historyk Paškievič
