Viačasłaŭ lažaŭ u lakarni, ciapier chvaroba adstupiła, jon pačuvajecca lepiej, nastroj u jaho badziory, — raspavioŭ pravaabaronca. — Adnak jość i nie takija dobryja naviny: vierahodna, što z 11 krasavika jaho nakiravali ŭ štrafny izalatar. Za jakija praviny i na jaki termin, nieviadoma».
Videaapieratar-fryłansier Viačasłaŭ Łazaraŭ adbyvaje prysud u mahiloŭskaj kałonii № 15. Jon maje adbyć piać hadoŭ pazbaŭleńnia voli ŭ kałonii va ŭmovach ahulnaha režymu — taki vierdykt 22 listapada 2023 hoda vynies Viarchoŭny sud u vyniku razhladu apielacyjnaj skarhi žurnalista.
Raniej sud pieršaj instancyi — Viciebski abłasny ŭ asobie sudździ Jaŭhiena Burunova — pryhavaryŭ Łazarava da piaci z pałovaj hadoŭ pazbaŭleńnia voli ŭ kałonii va ŭmovach ŭzmocnienaha režymu, pryznaŭšy vinavatym pavodle častak 2 i 1 artykuła 361-4 Kryminalnaha kodeksa (sadziejničańnie ekstremisckaj dziejnaści). Sudździa Viarchoŭnaha suda Juryj Rutkoŭski pierakvalifikavaŭ abvinavačańnie žurnalistu na častku 3 artykuła 361-1 Kryminalnaha kodeksa (udzieł u ekstremisckim farmavańni).
Viačasłava Łazarava sudzili razam z žonkaj Taćcianaj Pyćko: ich abodvuch vinavacili ŭ supracy z telekanałam «Biełsat», abvieščanym u Biełarusi ekstremisckim farmavańniem. Viciebski abłasny sud pryznačyŭ žančynie try hady pazbaŭleńnia voli ŭ kałonii ahulnaha režymu. Viarchoŭny sud, razhledzieŭšy apielacyjnuju skarhu, pryznaŭ Taćcianu Pyćko vinavataj pavodle č. 3 art. 361-1 Kryminalnaha kodeksa (udzieł u ekstremisckim farmavańni) i pastanaviŭ prysudzić joj 3 hady źniavoleńnia, ale z adterminoŭkaj vykanańnia pakarańnia. Źniavoleńnie Taćciana maje adbyć, kali małodšaj, ahulnaj ź Viačasłavam Łazaravym, dačce Jevie spoŭnicca try hady. Zaraz žonka asudžanaha žurnalista na voli.
Videaapieratara-fryłansiera zatrymali 9 lutaha 2023 hoda ŭ Viciebsku paśla pieratrusu ŭ kvatery pa miescy rehistracyi. U jaho zabrali mabilnyja telefony i videakamieru. Taksama siłaviki praviali pieratrusy ŭ kvatery, jakuju zdymaŭ Łazaraŭ, i pa miescy rehistracyi jahonaj žonki, adtul taksama zabrali noŭtbuk i dva telefony. Taćcianu Pyćko zatrymali 6 červienia 2023 hoda — paśla čarhovaha pieratrusu ŭ jaje žylli. Na momant zatrymańnia Taćciana Pyćko była ŭ dekretnym adpačynku — dačce Jevie tolki spoŭniŭsia 1 hod i 1 miesiac. Pakolki za kratami apynulisia abodva baćki, dziaŭčynku zabrała sacyjalnaja słužba i źmiaściła jaje ŭ dziciačuju abłasnuju lakarniu, potym dzicia zmahli zabrać pad apieku svajaki Taćciany. Dvaich starejšych dziaciej Taćciany ad pieršaha šlubu dahladaŭ ich rodny baćka.
Viačasłaŭ Łazaraŭ znachodzicca za kratami ŭžo 14 miesiacaŭ. Biełaruskaja pravaabarončaja supolnaść pryznała jaho palityčnym viaźniem.
8 śniežnia 2023 hoda Ministerstva ŭnutranych spraŭ uniesła žurnalista-fryłansiera ŭ śpis «asobaŭ, datyčnych da ekstremisckaj dziejnaści».
