Źniavoleńnie i 2,5 miljona štrafu — prysud za supraciŭ milicyi paśla vyviešvańnia bieł-čyrvona-biełaha ściaha ŭ Viciebsku.
U takim stanie letaś 3 vieraśnia Aleha Surhana pryvieźli ŭ pastarunkak.
Taki vynik suda nad siabrom arhkamitetu partyi Biełaruskaja Chryścijanskaja Demakratyi i supołki «Maładaja Biełaruś» Aleham Surhanam.
Sudovy praces nad im pačaŭsia ŭ Viciebsku 1 lutaha. Jaho abvinavačvali ŭ parušeńni artykułu 364 KK «Supraciŭ rabotnikam milicyi».
Sprava była zaviedzienaja jašče ŭ vieraśni, kali braty Taras i Aleh Surhany vyviesili bieł‑čyrvona‑bieły ściah na prypynku hramadskaha transparta la Mieduniviersiteta.
Adzin ź milicyjantaŭ, što zatrymlivaŭ apazicyjanieraŭ, zajaviŭ, što Aleh Surhan ukusiŭ jaho za palec.
27 studzienia Aleha źmiaścili ŭ śledčy izalatar.
Pradstaŭnik abvinavačańnia zapatrabavaŭ dla Surhana pakarańnie ŭ vyhladzie troch hadoŭ pazbaŭleńnia voli ŭ kałonii strohaha režymu. Sudździa Jaŭhien Burunoŭ spyniŭsia na miakčejšym pakarańni: paŭhoda aryšta i 2,5 miljona na karyść paciarpiełaha milicyjanta, jakomu była naniesiena «rana paznohcievaj fałanhi».
Dva dziesiatki aktyvistaŭ u zale suda sustreli prysud vyhukami «Hańba». Siarod ich byŭ i staršynia arhkamiteta Biełaruskaj Chryścijanskaj Demakratyi Pavał Sieviaryniec.
«U Biełarusi źjaviŭsia jašče adzin palitviazień, — kaža Sieviaryniec. — U minułym Surhan sapraŭdy siadzieŭ za kryminalnyja artykuły. Ale hety čałaviek adkryta kazaŭ, što chacieŭ svajoj dziejnaściu dziela nacyi vykupić hrachi svajho minułaha».
Surhan śćviardžaje, što supraciŭlaŭsia milicyjantam, bo tyja jaho pa-ludsku bili paśla zatrymańnia, pavalili na ziamlu, stavili nahu na hałavu. Milicyjanty tłumačyli svaje dziejańni patrebaj «supakoić» zatrymanaha.
