U kastryčniku‑listapadzie 2010 hoda UP «Kinavideaprakat» płanuje adkryć u Minsku jašče adnu ličbavuju zału dla pakazu trochmiernaha kino.
Pra heta na pres‑kanfierencyi 10 sakavika paviedamiŭ hienieralny dyrektar pradpryjemstva Vasil Koktyš.
Pavodle jaho słoŭ, ličbavaja kinazała budzie adkryta ŭ staličnym «Salucie».
U dalejšych płanach «Kinavideaprakata» — budaŭnictva piacizałavaha ličbavaha kinateatra na bazie «Avanharda» ŭ mikrarajonie Hrušaŭka. Nahadajem, pieršy 3D‑kinateatr «Kijeŭ» pačaŭ pracavać u Minsku 12 studzienia 2010 hoda.
Jak paviedamiŭ Koktyš, siońnia ŭ «Kijevie» prachodzić sieminar «Ličbavy kinapakaz i trochmiernaje kino» z udziełam zamiežnych śpiecyjalistaŭ — pradstaŭnikoŭ kampanij «Kinaton» (Hiermanija) i «Dołbi» (Vialikabrytanija), ź jakimi supracoŭničaje UP «Kinavideaprakat». Zamiežnyja śpiecyjalisty praviaduć techničnyja kansultacyi z rabotnikami biełaruskaha kinaprakatu, naviedajuć kinateatr «Salut» i aceniać mahčymaści jaho pieraabstalavańnia ŭ ličbavuju kinazału.
Jak zaznačyŭ Koktyš, za apošnija 10 hadoŭ «Kinavideaprakat» ažyćciaviŭ vialikuju pracu pa techničnym pieraasnaščeńni staličnaj kinasietki. Pavodle jaho słoŭ, kali ŭ 1997—1998 hadach znošanaść abstalavańnia ŭ minskich kinateatrach składała pryblizna 90%, to siońnia — 36%. «Heta bolš čym kamfortny stan», — zaŭvažyŭ jon. U krainach byłoha SSSR zaraz nie vyrablajecca abstalavańnie dla kinaprakatu, tamu Minsk u asnoŭnym zakuplaje techniku z Hiermanii i Vialikabrytanii, paviedamiŭ Koktyš.
Letaś staličnyja kinateatry naviedali 3 młn. 720 tys. hledačoŭ, što na 320 tys. bolš, čym u 2008 hodzie. Pavodle słoŭ Koktyša, užo za dva miesiacy hetaha hoda kinateatry naviedali 1 młn. 100 tys. čałaviek — na 250 tys. bolš, čym za anałahičny letašni pieryjad. Na bałansie UP «Kinavideaprakat» znachodziacca 14 kinateatraŭ.