Biełaruś u supracoŭnictvie z Brazilijaj raźličvaje vyjści na fiederalny ŭzrovień, zajaviŭ Alaksandr Łukašenka 22 sakavika ŭ Ryo-de-Žaniejra na sustrečy z prezidentam Łuisam Inasiu Łułam da Siłvam.
«My b chacieli, kab vy zrabili daručeńnie svajmu ŭradu, ministram, kab i jany zacikaŭlena adnieślisia da našych prapanoŭ, i my znajšli b kropki sudakranańnia na fiederalnym uzroŭni», — skazaŭ Łukašenka, słovy jakoha pryvodzić pres-słužba biełaruskaha kiraŭnika.
Jon adznačyŭ, što Biełaruś bačyć dla siabie vialikaje pole dziejnaści ŭ Brazilii,
asabliva ŭ suviazi z pryniataj prahramaj raźvićcia sielskaj haspadarki.
Sustreča prezidentaŭ «dazvoliła vyznačyć asnoŭnyja kirunki, jakija cikaviać abodva baki, u raźvićci supracoŭnictva». Pieradusim, «heta śfiery, jakija sadziejničajuć raźvićciu bujnoj sielskahaspadarčaj vytvorčaści, naprykład, pastaŭki techniki z usim spadarožnym abstalavańniem». Akramia taho, brazilski bok cikavić stvareńnie zboračnych vytvorčaściaŭ: heta mohuć być traktary i sielskahaspadarčaje abstalavańnie. «Surjoznaja zacikaŭlenaść» prajaŭlena da mahčymaści pastavak vialikahruznaj karjernaj techniki, samazvałaŭ BiełAZ.
Brazilija «zacikaŭlena ŭ dalejšych pastaŭkach kalijnych solaŭ ź Biełarusi».
«Naša kraina ŭžo vałodaje trećciu brazilskaha rynku pa pastaŭkach kalijnych uhnajeńniaŭ, i heta supracoŭnictva budzie pradoŭžana», — adznačajecca ŭ paviedamleńni.
Baki damovilisia, što budzie stvorana dvuchbakovaja handlova-ekanamičnaja kamisija, jakaja svaju pieršuju siesiju praviadzie ŭ Minsku.
Prezident Brazilii vitaŭ zajavu Łukašenki pra namier adkryć biełaruskaje pasolstva ŭ jaho krainie. Brazilija taksama adkryje pasolstva ŭ Minsku.
Łukašenka paćvierdziŭ udzieł Biełarusi ŭ III forumie «Aljans cyvilizacyj», jaki projdzie ŭ Ryo-de-Žaniejra ŭ mai i ŭpieršyniu naładžvajecca za miežami jeŭrapiejska-mižziemnamorskaha rehijonu.
Pa vynikach sustrečy prezidenty pryniali sumiesnuju dekłaracyju.
U pryvatnaści, jany damovilisia «pačać pieramovy dla bolš chutkaha padpisańnia mižnarodnych dahavoraŭ ab supracoŭnictvie ŭ halinie handlova-ekanamičnaha ŭzajemadziejańnia, sielskaj haspadarki, inviestycyj, navuki i technałohij, kultury, adukacyi, sportu i turyzmu», «aktyvizavać uzajemny abmien vizitami delehacyj dziełavych kołaŭ». Baki «vitali stvareńnie zboračnaj vytvorčaści biełaruskaj sielskahaspadarčaj techniki ŭ štacie Hojas». Prezident Brazilii «padkreśliŭ cikavaść brazilskaha boku da naroščvańnia i dyviersifikacyi ekspartnych pastavak praduktaŭ charčavańnia ŭ Biełaruś, uklučajučy soju i miasa, i pavieličeńnia abjomaŭ handlu ŭhnajeńniami».
Prezidenty «paćvierdzili cikavaść svaich dziaržaŭ da supracoŭnictva ŭ metach umacavańnia enierhietyčnaj biaśpieki, vykarystańnia alternatyŭnych i ŭznaŭlalnych krynic enierhii». Jany damovilisia raźvivać dvuchbakovaje supracoŭnictva ŭ śfiery vytvorčaści bijapaliva, majučy na ŭvazie pieradavy brazilski vopyt u vypusku i vykarystańni etanołu i bijadyzielnaha paliva.
Prezidenty «vitali ŭsie namahańni, skiravanyja na bolš chutkaje pieraadoleńnie mižnarodnaha finansava-ekanamičnaha kryzisu», i adznačyli važnaść kansalidacyi Hrupy-20 jak klučavoha forumu mižnarodnaha finansava-ekanamičnaha supracoŭnictva ŭ hetych metach. Adnačasova jany paćvierdzili svaju padtrymku «šmatbakovaj sistemie handlu».
