U subotu, 3 krasavika, startuje 20‑y čempijanat Biełarusi pa futbole ŭ vyšejšaj lizie. Adroźnivacca jon ad papiarednich budzie tym, što ŭ pieršynstvie voźmuć udzieł 12 kamandaŭ, jakija zhulajuć u try kruhi (kožny kłub praviadzie 33 hulni, kali nie samalikvidujecca pa chodzie siezona, naturalna).
Pieršy kruh skončycca ŭžo 22 traŭnia, u dzień finału futbolnaj Lihi čempijonaŭ.
Tury buduć pravodzicca nie tolki ŭ suboty i niadzieli, ale i siarod tydnia. Prykładam, u krasaviku tak budzie z trecim i šostymi turami (14 i 28 krasavika, sierada).
Druhi kruh zavieršycca 22 žniŭnia, ale ŭ lipieni budzie ŭziaty trochtydniovy pierapynak, źviazany z udziełam biełaruskich kłubaŭ u kvalifikacyi jeŭrakubkaŭ. Skončycca čempijanat 20 listapada.
Adna ź intryhaŭ čempijanatu zaklučajecca ŭ tym, ci składzie chto kankurencyju BATE, što stanaviłasia čatyry razy zapar čempijonam krainy, hodnuju kankurencyju. I adpaviedna ci dahonić BATE pa kolkaści tytułaŭ minskaje «Dynama» (pakul 6 suprać 7).
Cikava taksama, chto vylecić z elity ajčynnaha pieršynstva i jakoje miesca zojmie salihorski «Šachcior», ačoleny lehiendaj biełaruskaha futboła Eduardam Małafiejevym
U pieršym tury 3 krasavika hulajuć:
«Dynama» Brest — «Šachcior» Salihorsk (Brest, pačatak a 17:00, kvitok — 5 500, dziciačy — 2 000).
«Tarpieda» — BATE (Žodzina, 14:00, kvitok 5 000, dziciačy 2 000).
«Biełšyna» Babrujsk — «Dynama» Minsk. Matč projdzie ŭ Mahilovie na stadyjonie «Spartak», pačatak a 17‑j, kvitki — 3 000 — 5 000 (dziciačy — 1 500).
«Naftan» (Navapołack) — «Partyzan» — (Minsk). Matč projdzie ŭ Viciebsku. Pačatak a 15:00. Kvitki 4 000 — 5 000 (dziciačy — 2 000).
«Nioman» Hrodna — «Viciebsk». Pačatak a 17‑j, kvitki 4 000 — 7 000 (dziciačy — 2 000).
«Minsk» — «Dniapro» Mahiloŭ. Stadyjon «Dynama». Pačatak a 16‑j, uvachod volny, ale kolki kaštuje vychad :)
Źbirajučysia na futboł, treba pamiatać, što nadvorje pamianiałasia, i va ŭsich haradach, dzie buduć pravodzicca matčy (zrešty, jak i pa ŭsioj Biełarusi) abiacajuć daždžy,
a ŭ Mahilovie navat mocnyja. Słupok termomietra nie pieravysić adznaki 9 hradusaŭ ciapła.
***
Usie čempijony krainy:
1992, siezon 1992/1993, 1993/1994, 1994/1995, 1995, 1997, 2004 — «Dynama» Minsk:
1999, 2002, 2006, 2007, 2008, 2009 — BATE.
1996 — MPKC, 2000 — Słavija (Mazyr).
1998 — «Dniapro‑Transmaš» (Mahiloŭ).
2001 — «Biełšyna».
2003 — «Homiel».
2005 — «Šachcior».
«Słavija» daŭno nie hulaje ŭ vyšejšaj lizie z 2006-ha hoda, «Homiel» vylecieŭ z elity ŭvosień, a «Biełšyna» naadvarot viarnułasia ŭ vyšejšuju lihu, vyjhraŭšy ŭ 2009 hodzie čempijanat u pieršaj.
Darečy, čempijanat u pieršaj lizie startuje 17 krasavika, na start vychodziać 16 kamandaŭ, kolki dabiarucca da finiša - taksama intryha.
