Aktyvist mižnarodnaj maładziožnaj arhanizacyi «Małady front» Rusłan Matviejeŭ 1 krasavika byŭ dapytany pa kryminalnaj spravie, źviazanaj z naniasieńniem nadpisaŭ «Žyvie Biełaruś!» na budynak suda Pieršamajskaha rajona Minska,
paviedamiŭ pres‑sakratar arhanizacyi Stanisłaŭ Stesik.
Pavodle jaho słoŭ, u noč z 11 na 12 sakavika nieviadomymi byli naniesieny nadpisy palityčnaha charaktaru na aharodžu kala suda Pieršamajskaha rajona i na sam budynak suda. U suviazi z hetym supracoŭniki UUS Pieršamajskaha rajona raspačali kryminalnuju spravu.
Jak paviedamiŭ Stesik, śledčy Śmirnoŭ pytaŭsia ŭ Matviejeva ab jaho palityčnych pierakanańniach, dziejnaści ŭ arhanizacyi, pra toje, u jakich strukturach jon jašče znachodzicca i čym zajmajecca ŭ hety momant. «Taksama śledčy cikaviŭsia, chto ź jaho siabroŭ moh nanieści hetyja nadpisy. Pavodle źviestak milicyi, nadpisy byli naniesieny z 12 da 3 hadzin nočy.
Matviejevu pakazali razdrukoŭku zvankoŭ, pradastaŭlenuju mabilnym apierataram, zhodna ź jakoj jamu zvanili ŭ tuju noč u 2 hadziny i jon tady byŭ u rajonie Pieršamajskaha suda. Jamu prapanavali davać adkazy na palihrafie, ale jon admoviŭsia», — paviedamiŭ Stesik.
Śledčy taksama pakazaŭ Matviejevu fatahrafiju, na jakoj pad adnym z nadpisaŭ byŭ ukazany numar jaho mabilnaha telefona. Aktyvist zajaviŭ, što nie viedaje, chto moh jaho ŭkazać.
U Matviejeva ŭziali adbitki palcaŭ, ślinu dla analizu DNK, a taksama paviedamili, što jon budzie vyklikany dla dačy bolš padrabiaznych pakazańniaŭ.
