«NN» paraŭnoŭvaje canu košyka praduktaŭ u Minsku i susiednich stalicach.
Rost VUP, źmieny padatku na dabaŭlenuju vartaść i miljardnyja kredyty ad MVF — ličby, dalokija ad nasielnictva. Kali da aźviareńnia spračajucca sa svajakom z susiedniaj krainy, kamu žyviecca lepš, adkaz šukajuć nie ŭ statystyčnych spravazdačach, a ŭ pobycie. Jakuju atrymlivajuć zarpłatu, kolki addajuć za žyllo i što mohuć kupić u kramach.
«NN» vyrašyła razabracca z trecim pradmietam sprečak ź pieraličanych i paraŭnała ceny na košyk praduktaŭ u zvyčajnych praduktovych kramach susiednich stalic — u Minsku, Maskvie, Kijevie, Vilni i Varšavie. Kolki kaštujuć chleb, małako, bulba, jajki, kaŭbasa, jabłyki z bananami i, narešcie, sok. Z usiaho asartymientu abirałasia samaja nizkaja cana, ale pad uvahu nie bralisia źnižki i rasprodažy, bo jany nie zaŭsiody dakładna adlustroŭvajuć stan rynku.
Biełarusy siadziać na chlebie i małace
Niezdarma, vypraŭlajučysia ŭ hości da svajakoŭ, biełarusy viazuć z saboj paru bochanaŭ «Naračanskaha» chleba. Mała taho, što smačna, dyk jašče i niadoraha! Maskoŭski chleb daražejšy ŭ paŭtara razu, niepadalok ad jaho i varšaŭski ź vilenskim.
Biełaruś słavicca jašče i jak małočnaje karaleŭstva. Niahladziačy na stratnaść małakazavodaŭ, dziaržava trymaje ceny nizkimi. Dziaržaŭnuju padtrymku sielskaj haspadarki beściać ekanamisty‑libierały, ale nasielnictva ciešycca. 1560 rubloŭ za litr — udvaja tańniej, čym u Maskvie! Tym samym ułady dajuć mahčymaść isnavać aršanska‑smalenskim małočnym ciahnikam. Vypraŭlajučysia štodzień na rynak u Rasiju, abviazanyja avośkami sa śmiatanaj biełaruskija babulki robiać dobry biznes. Bolš zarablajuć tolki padpiarazanyja śpirtam u pakietach i cyharetami «čaŭnaki», jakija jeździać u Litvu i Polšču.
Kraina bulby biez bulby
Jak kraina, jakuju nazyvajuć bulbianoj, pradaje marakanskuju bulbu zamiest svajoj — asobnaja tema. Jak i toje, što miascovyja karniapłody nie adpaviadajuć patrabavańniam taho ž «Makdonaldsa». Ale fakt zastajecca faktam — pa bulbu minčukam možna vypraŭlacca ŭ Kijeŭ ci Vilniu. Tam za kiłahram tre budzie zapłacić mienš za tysiaču rubloŭ. Viadoma ž, miech bulby pravieźci praź miažu budzie składana.
Zdajecca, kali b palakam dazvolili zavalić usie susiednija krainy jabłykami — jany b heta zrabili. 1740 rubloŭ za kiłahram — heta nie pabitaja i niedaśpiełaja sadavina, a vialikija čyrvonyja pryhažuny. Śmiešna skazać, ale jabłyki ŭ Polščy tańniejšyja za bulbu. Inšaja sadavina — apielsiny z bananami — taksama kaštuje ŭ palakaŭ mienš, čym u susiedziaŭ. U tuju ž katehoryju zdarovaha charčavańnia možna adnieści i soki.
Zamiest miasa — jajki
Niahladziačy na šmatlikija skarhi rasijan na niajakasnaje miasa, ich ceny navat na takuju nie nadta smačnuju kaŭbasu vielmi vysokija. Paŭkiłahrama varanaj — u jakoj časam niama nijakaha miasa, a tolki adna soja — abydziecca ŭ 7240 rubloŭ. Palak za tyja ž hrošy kupić sabie nie 500, a 650 hramaŭ kaŭbasy.
Adzinaje, čym mohuć hanarycca rasijanie — jajki. U hetaj naminacyi jany atrymali zasłužanaje pieršaje miesca. Praŭda, adzinaje. Usie astatnija pradukty ŭ Maskvie daražejšyja, čym u Minsku.
Załataja siaredzina
Takim čynam, paraŭnajem košyki.
Samy tanny jon akazaŭsia ŭ Varšavie — 24 180 rubloŭ.
Minsk i Kijeŭ prykładna na adnym uzroŭni — pa 26 tysiač rubloŭ.
Vilenski košyk ciahnie amal na 29 tysiač. A voś šmatmiljonnaja Maskva niezdarma ličycca darahim horadam — zakanamiernaje apošniaje miesca ŭ rejtynhu z 30600 rubloŭ.
Praŭda, akcyi i rasprodažy, jakija my pradbačliva nie ŭličvali, kažuć nie na karyść biełaruskaj stalicy. Soki — voś, u pryncypie, i ŭsio, na što pakupniki mohuć atrymać źnižki ŭ Minsku. 1990 rubloŭ za litr — norma dla biełaruskich hipiermarkietaŭ.
U astatnich stalicach inakš. Vilency časam žyvuć ad rasprodažu da rasprodažu. «Uvachodzim ŭ hipiermarkiet i bačym — siońnia ¬50%‑ia źnižki na kurycu, rys i šakaład. Značycca, na bližejšy tydzień naša mieniu pradvyznačanaje», — śmiajucca studenty Jeŭrapiejskaha humanitarnaha ŭniviersiteta.
A voś zarobki i košt žylla ŭ haradach — pytańni, jakija taksama istotna ŭpłyvajuć na dabrabyt nasielnictva, stanuć temami nastupnych paraŭnalnych analizaŭ.
