Mitrapalit Minski i Słucki Fiłaret, patryjaršy ekzarch usiaje Biełarusi, atrymaŭ vyšejšuju ŭznaharodu Kamiteta dziaržaŭnaha kantrolu — nahrudny znak KDK.
Jak paviedamili ŭ pres‑słužbie kamiteta, pradstajaciel Biełaruskaj pravasłaŭnaj carkvy ŭznaharodžany «za značny ŭkład u duchoŭna‑maralnaje i patryjatyčnaje vychavańnie rabotnikaŭ orhanaŭ finansavych rasśledavańniaŭ». Nahrudny znak jamu ŭručyŭ 8 krasavika staršynia KDK Zianon Łomać.
Akramia hetaha, pradstaŭnikam Biełaruskaj pravasłaŭnaj carkvy ŭručany hanarovyja hramaty Kamiteta dziaržkantrolu.
Mitrapalit Fiłaret, u svaju čarhu, uručyŭ kiraŭnictvu finansavaj milicyi Kamiteta dziaržkantrolu abraz apostała Paŭła,
jaki z 2009 hoda byŭ abrany niabiesnym zastupnikam orhanaŭ finansavych rasśledavańniaŭ. Mienavita hetamu śviatomu naležać słovy: «Korań bo ŭsim złym — srebralubstva jość». Heta ž vysłoŭje pracytavana i na abrazie.
Jak adznačyŭ mitrapalit Fiłaret, asnoŭnaja zadača rabotnikaŭ finansavaj milicyi zaklučajecca ŭ zachavańni ekanamičnaj biaśpieki krainy i spynieńni złačynstvaŭ u ekanamičnaj śfiery.
Abraz apostała Paŭła, napisany ikanapiscam prychodu chrama abraza Božaj Maci «Usich tužlivych Radaść» u Minsku Volhaj Čarniak, byŭ uručany namieśniku staršyni KDK, dyrektaru departamienta finansavych rasśledavańniaŭ Ryhoru Viaremku. Kopii abraza ŭručany kiraŭnikam abłasnych upraŭleńniaŭ departamienta finansavych rasśledavańniaŭ KDK, a taksama staršyni Kamiteta dziaržaŭnaha kantrolu Zianonu Łomaciu.
