Jeŭrasajuz zaniepakojeny asobnymi aśpiektami daterminovaha hałasavańnia ŭ Biełarusi, havorycca ŭ zajavie pasolstva Vialikabrytanii, jakoje pradstaŭlaje ŭ Minsku staršyniu ES Ispaniju.
Jeŭrapiejski sajuz zaklikaje biełaruskija ŭłady praciahnuć dyjałoh z ABSIE dla palapšeńnia vybarčych pracedur. U zajavie zaznačajecca, što ŭniesienyja ŭ vybarčaje zakanadaŭstva papraŭki »ŭtrymlivajuć namiery pavialičyć prazrystaść pracesu hałasavańnia i dałučyć da vybarčaha pracesu jašče bolš šyrokija hrupy nasielnictva, što zasłuhoŭvaje ŭchvały». Adnak nazirańnie za vybarami ŭ miascovyja saviety 25 krasavika pakazała, što «realizacyja novaha vybarčaha zakanadaŭstva maje niekalki ŭraźlivych momantaŭ, na jakija pavinna być źviernuta ŭvaha padčas dalejšaha dyjałohu z ABSIE».
«Adnym z takich momantaŭ źjaŭlajecca daterminovaje hałasavańnie, šerah aśpiektaŭ jakoha vyklikajuć zaniepakojenaść. U pryvatnaści, praktyka asobnaha padliku i abjaŭleńnia vynikaŭ daterminovaha hałasavańnia, hałasavańnia doma i asnoŭnaha hałasavańnia nie była paŭsiamiesnaj», — havorycca ŭ zajavie. Zaznačajecca taksama, što ŭ šerahu vypadkaŭ «rezka adroźnivalisia» vyniki daterminovaha hałasavańnia 20—24 krasavika i ŭ asnoŭny dzień 25 krasavika.
Naziralniki krain ES naviedali bolš jak 140 vybarčych učastkaŭ u stalicy i rehijonach i zmahli prysutničać pry padliku hałasoŭ. «Jeŭrasajuz vykazvaje ŭdziačnaść uładam za zaprašeńnie ŭziać udzieł u nazirańni», — zaznačajecca ŭ zajavie.
Pavodle źviestak Centrvybarkama, jaŭka vybarščykaŭ na miascovych vybarach skłała 79,5%. U hałasavańni ŭziali ŭdzieł 5.591.264 žychary krainy. Pry hetym u daterminovym hałasavańni — 2.067.069 čałaviek, pa miescy znachodžańnia vybarščykaŭ — 446.748. U dzień vybaraŭ na ŭčastkach prahałasavali 3.077.447 čałaviek.
