U Viarchoŭnym sudzie Biełarusi na pracesie nad eks‑prakuroram Mienskaj vobłaści Michaiłam Śniehirom i byłym dyrektaram firmy «Zabudova» Michaiłam Kudziełkam skončylisia sudovyja sprečki.
Prysud u spravie Michaiła Śniehira i Michaiła Kudziełki budzie abvieščany 7 traŭnia. Hetak skazaŭ staršynia sudovaj kalehii pierad tym, jak sud syšoŭ rychtavać prysud.
Nahadaju, Michaiłu Śniehiru pradstaŭnik abvinavačańnia paprasiŭ 8 hadoŭ źniavoleńnia z kanfiskacyjaj majomaści, a jahonamu nibyta saŭdzielniku Michaiłu Kudziełku — 4 hady, taksama z kanfiskacyjaj. Abodva nibyta vinavatyja ŭ chabarnictvie i złoŭžyvańniach słužbovym stanoviščam. Jak paviedamiŭ advakat Anatol Šapialevič, vinavatymi siabie abvinavačanyja nie pryznali, pra što znoŭ paŭtaryli ŭ apošnim słovie. Ja spytaŭsia, jak Michaił Śniahir patłumačyŭ svaju datyčnaść da budaŭnictva katedžu na bierazie Mienskaha mora:
«Detali ja ž nie mahu skazać. Pra katedž prosta: jon udzielničaŭ u jahonym budaŭnictvie, u adździełcy katedžu. Toje, što jon i kazaŭ napiaredadni spravy».
Praces nad eks‑prakuroram Michaiłam Śniehirom i byłym dyrektaram firmy «Zabudova» Michaiłam Kudziełkam idzie za začynienymi dźviaryma. Praces ciahniecca z 10 žniŭnia.Za hety čas, pavodle źviestak, na sudzie byli apytanyja bolš za sto śviedak. Jak vynik? Raniej pra spravu advakat kazaŭ: «Hara naradziła myš». Ja spytaŭ u Anatola Šapialeviča, jak ciapier, paśla zakančeńnia sprečak, jon aceńvaje abvinavačańnie:
«Jašče bolš pierakanaŭsia ŭ tym, što hara naradziła myš».
Prysud u spravie budzie abvieščany 7 traŭnia. Pavodle źviestak, na abviaščeńni dazvolać prysutničać publicy i žurnalistam.
***
U listapadzie 2008 hodu Alaksandar Łukašenka zahadaŭ źniać z pasadaŭ Michaiła Śniehira i namieśnika hienprakurora Mikałaja Kupryjanava dy pryciahnuć ich da kryminalnaj adkaznaści ŭ suviazi z historyjaj ab elitnaj kvatery Śniehira ŭ Miensku pa vulicy Cimirazieva. Tady padazreńni ŭ datyčnaści da karupcyi byli vykazanyja taksama na adras sudździaŭ Centralnaha sudu Miensku Aleny Iljinoj, Valera Jeśmana i Taciany Paŭličuk. Z hetych sudździaŭ straciła pasadu tolki Alena Iljina. Paźniej u spravie Śniehira pačaŭ fihuravać i katedž kala Mienskaha mora, pabudavany nibyta na padstaŭnych asobaŭ.