Dysk «Agitpop» źjavicca 26 červienia ŭ Hiermanii. Ale jaho prezientacyja adbudziecca na tydzień raniej.
Kancert 17 červienia ŭ bierlinskim kłubie Festsaal Kreuzberg stanie pieršym u miežach proma-tura. Zatym hurt vystupić jašče ŭ Drezdenie, Hamburhu i na hałandyskim fiestyvali «Mundial» u Ciłburhu.
Na albom «Agitpop» uvojduć 16 trekaŭ z apošnich troch albomaŭ («Kapitał», «Manifest», «Kultpraśviet») i dva remiksy na pieśniu «Kapitał» Ihara Udovina i Noize MC. Vypuskaje albom bierlinski łejbł Eastblock Music.
Kancertami ŭ Hiermanii i Hałandyi jeŭrapiejskija vystupleńni «Lapisa Trubiackoha» nie skončacca. 17 lipienia kamanda adyhraje na «Basoviščy» ŭ Polščy, a 13 žniŭnia na vienhierskim Sziget. 5 listapada ŭ hurtu zapłanavany kancert u Chielsinki.
Biełarusy pačuć «Lapisaŭ» zmohuć 29 maja na fiestyvali «Palana», jaki projdzie ŭ RHC «Siličy». Na adnu scenu z kamandaj vyjduć «Rubl» Siarhieja Šnurava, «Paru rublej» i UNIA.
