29—30 maja padčas śviatkavańnia 945‑hadovaha jubileju horada na Zamkavaj hary źbiarucca ramieśniki, vajary, muzyki
Čarhovaje mierapryjemstva, jakoje praciahnie akcyju «Pa darozie na Hrunvald», adbudziecca ŭ histaryčnym centry staražytnaha horada Bračysłava Połackaha. Z vyšyni Zamkavaj hary, dzie projdzie asnoŭnaja prahrama, turystam adkryjecca cudoŭny vyhlad na aziory Naviata i Dryviaty.
Heta nie pieršy dośvied ładžańnia ŭ miastečku siaredniaviečnaj imprezy: štohod tut adbyvajecca Śviata ramiostvaŭ, jakoje źbiraje ŭsio bolš udzielnikaŭ i turystaŭ. Sioleta, dziakujučy Brasłaŭskim rajvykankamu i muziejnamu abjadnańniu, dni siaredniaviečnaj kultury na Zamkavaj hary nabyli bolš šyroki farmat i źjaŭlajucca histaryčnaj častkaj uračystaha śviata horada, jakomu spaŭniajecca 945 hadoŭ.
U śviacie voźmuć udzieł majstry‑rekanstruktary staražytnych ramiostvaŭ. Za navukovuju častku adkaznyja viadomyja vučonyja i archieołahi Mikoła Płavinski, Mikoła Kryvalcevič, Siarhiej Tarasaŭ i Andrej Kištymaŭ.
Jašče nie paćvierdzili svajho udziełu hrupa archieołahaŭ ź Litvy i vajarskaja hrupy Jantar z Polščy. Kali heta adbudziecca, śviata maje šaniec nabyć mižnarodny status. Dla amataraŭ muzyki i tancaŭ zajhrajuć biełaruskija hurty Terrae vagancika, Testamentum terrae, Sornucopia, «Niamiha». Vajaŭničy status dzion siaredniaviečnaj kultury prademanstrujuć piać rycarskich kłubaŭ. Darečy, padčas śviata na Zamkavaj hary budzie dziejničać rycarski aboz.
Kab u im raźmiaścicca, udzielniki mierapryjemstva pavinny mieć histaryčny namiot, histaryčnaje načyńnie dla pryhatavańnia i ŭžyvańnia ježy, histaryčnyja stroi.
Dla raźviadzieńnia na terytoryi aboza vohnišča pradstaŭniki kłubaŭ musiać pakłapacicca pra mietaličny paddon — hetaha patrabujuć normy zachoŭvańnia pomnika archieałohii, jakim źjaŭlajecca Zamkavaja hara. Zajezd rycaraŭ pačniecca ŭviečary 28 maja. Muzyki, majstry i archieołahi mohuć dałučycca da śviata ŭ zručny dla ich čas.
Prahrama Dzion siaredniaviečnaj kultury «Mieč Bračysłava»
