Pryjšoŭ čas pastavić navuku na karyść mužčyny!
Jak mieć pośpiech u žančyn? Spytajcie ŭ piaci roznych mužčyn i atrymajecie 5 roznych adkazaŭ. A voś pieranakirujcie hetaje pytańnie šatłandskim navukoŭcam z univiersiteta Abierdyna, jakija niadaŭna praviali ekśpierymient na temu seksualnaj pryvabnaści. Jany adkažuć vam: «Chłopcy, nie durycie sabie i inšym hałavu! Vam dastatkova tolki vyciahnuć u žančyny ŭśmiešku tak, kab heta pabačyła abrańnica vašaha serca. Usio astatniaje za vas zrobić evalucyja».
Takim čynam, adsiul vyvodzim paradu № 1 — «Raśśmiašy jaje siabroŭku». Tak-tak, mienavita siabroŭku, a nie jaje samu. Navukoŭcy z univiersiteta Abierdyna navukovym šlacham vyśvietlili, što žančyny, jakija bačać inšuju žančynu, što ŭśmichajecca nieznajomamu mužčynu, pačynajuć ličyć taho mužčynu pryvabnym i pryhožym. Vo jak.
Ciapier nieabaviazkova čyrvanieć pierad abliččam upadabanaj dziaŭčyny dy pleści joj aby-što. Dastatkova zaśpieć jaje ź jakoj-niebudź siabroŭkaj i, źviartajučysia mienavita da siabroŭki, bieź cieniu soramu raskazać śmiešny aniekdot.
Adsiulsama, darečy, i parada № 2 – «Śmiašy, a nie rabi stanoŭčaje ŭražańnie». Chopić praktykavacca ŭ skazie «U mianie svaja firma i ja lublu filmy Kusturycy». Zamiest taho kab pnuć žyły, davodziačy žančynie, što ty varty ŭvahi jak asoba, dastatkova prosta vyklikać śmiech.
U daśledavańni šatłandskich navukoŭcaŭ uziali ŭdzieł 60 studentak. Navukoŭcaŭ cikaviła, jakija pryčyny ŭpłyvajuć na žančyn padčas vybaru seksualnaha partniora. Studentak paprasili pahladzieć fatahrafii i pravieści hradacyju pryvabnaści vyjaŭlenych na fotazdymkach mužčyn. I što ž vyśviatlajecca? Najbolš seksualnymi vyjavilisia mužčyny, što na zdymkach paśpiachova śmiašyli inšych žančyn.
Tamu naša parada №3 — «Pasłuhujsia evalucyjaj — zaviadzi sabie pryhožuju pryjacielku». Praŭda, ty maješ pryjacielku – seksapilnuju dziaŭčynu, siabroŭku dziacinstva, ź jakoj — a vy abodva viedajecie heta dakładna — nikoli ničoha nie atrymajecca? Pryjšoŭ čas vyprabavać vaša siabroŭstva. Paprasi jaje schadzić z taboju na viečarynku, prezientacyju, dzie budzie prysutničać tvaja abrańnica. Što treba rabić — łamać kamiedyju: staroj siabroŭcy ty niešta aktyŭna apaviadaješ, jana ŭśmichajecca i čas ad času navat hučna śmiajecca, pryciahvajučy ŭvahu tvajoj upadabanki. Pavodle šatłandskich navukoŭcaŭ, mienavita paśla hetaha inšyja žančyny pačnuć kidać na vas zacikaŭlenyja pozirki («Što hetaja krasunia ź im robić?», «Napeŭna, hety mužčyna sapraŭdy varty ŭvahi žančyny» i da t.p.).
«My schilnyja stavicca da seksualnych upadabańniaŭ jak da subjektyŭnaj rečy, ale ž nasamreč na ich majuć upłyŭ inšyja ludzi», — kaža d-r Ben Džons, jaki i arhanizavaŭ hety ekśpierymient va ŭniviersitecie Abierdyna.
D-r Džons ličyć hety ekśpierymient prajavaj evalucyi. Pa-pieršaje, uśmieška zaŭsiody śviedčyć, što na (pad)śviadomym uzroŭni ludzi ličać, što ŭ taho, chto śmiajecca, usio dobra.
«Kali seksualnaść nie takaja vidavočnaja abo ciažka dać adnaznačnuju acenku mužčynu, dyk mnohija žančyny prosta pačynajuć imitavać pavodziny inšych žančyn, — kaža d-r Džons. — Tyja žančynu dumajuć pryblizna hetak: «Jak inšym z tym mužčynam dobra, dyk značyć, inšaja žančyna viedaje niešta, čaho nie viedaju ja» ».
P. S. I apošniaja naša parada № 4 — «Nie pieraihryvaj!» Nievierahodnaja žančyna pobač z taboju dziare baki ad śmiechu, ty sam vypramieńvaješ daścipnaść i najvyšejšuju pryvabnaść. Ciapier upadabanaja taboj dziaŭčyna rasčarujecca i moža padumać, što ty nastolki fajny, što… nie dla jaje.
