«Reparciory bieź miežaŭ» škadujuć, što cisk na biełaruskuju presu z nabližeńniem prezidenckich vybaraŭ uzmacniajecca. Pra heta havorycca ŭ admysłovaj zajavie, jakuju arhanizacyja raspaŭsiudziła 17 žniŭnia.
Havorka idzie najpierš pra papiaredžańni, padatkavyja pravierki i milicejskija rejdy, jakija, na dumku «Reparcioraŭ», śviedčać pra toje, što svaboda presy ŭ Biełarusi apynułasia ŭ niebiaśpiecy.
«Paśla atrymańnia šerahu papiaredžańniaŭ ad Ministerstva infarmacyi dźvie viadučyja apazicyjnyja haziety — „Narodnaja vola“ i „Naša Niva“ — mohuć być zakrytyja pavodle art. 51 zakona „Ab ŚMI“, jaki dazvalaje ŭładam inicyjavać zakryćcio navat paśla dvuch papiaredžańniaŭ», — padkreślivajuć «Reparciory» i nahadvajuć, što na rachunku abiedźviuch haziet užo naličvajecca pa try takich sankcyi.
Arhanizacyja cytuje hałoŭnaha redaktara «NN» Andreja Skurko, jaki rasceńvaje hetyja papiaredžańni, jak i pazapłanavuju padatkovuju pravierku redakcyi, jak sprobu zapałochać žurnalistaŭ.
«Reparciory» pryhadvajuć taksama milicejskija «vizity» ŭ redakcyju «Narodnaj voli» zimoj i viasnoj h.h., kali ŭ žurnalistaŭ vydańnia zabrali kampjutery, a paśla šmat razoŭ dapytvali ŭ miežach rasśledavańnia spravy ab paklopie na čynoŭnika śpiecsłužb.
«Paśla trochhadovaha vyklučeńnia ź biełaruskich sistem raspaŭsiudu, jakija całkam kantralujucca dziaržavaj, „Narodnaja vola“ i „Naša Niva“ znoŭ pačali raspaŭsiudžvać z 2008 hoda ŭ vyniku damoŭlenaściaŭ pamiž Biełaruśsiu i Jeŭraźviazam. „Reparciory bieź miežaŭ“ apasajucca, što ŭsie tyja tryvožnyja sihnały, što zaraz pastupajuć na adras vydańniaŭ, prakładajuć šlach dla novych uradavych zabaronaŭ napiaredadni kampanii pa vybarach prezidenta», — havorycca ŭ zajavie.
Arhanizacyja zaniepakojenaja i inšymi prablemami, ź jakimi davodzicca sutykacca biełaruskim žurnalistam — heta i zabarona na supracoŭnictva z zamiežnymi ŚMI biez akredytacyi, i faktyčnaje pryznańnie niezakonnaj dziejnaści fryłansieraŭ. («Reparciory» pryhadvajuć tut niadaŭniaje papiaredžańnie homielskaj žurnalistcy Taćcianie Bublikavaj).
Tryvohu «Reparcioraŭ bieź miežaŭ» vyklikaje i cisk na žurnalistaŭ z boku milicyi —
naprykład, stvareńnie pieraškod u pracy karespandentaŭ «Jeŭraradyjo», «Našaj Nivy», Radyjo «Svaboda», jakija aśviatlali vuličnuju akcyju aktyvistaŭ kampanii «Havary praŭdu!» 12 žniŭnia.
