Alaksandru Łukašenku siońnia spaŭniajecca 56 hadoŭ. Svoj dzień naradžeńnia kiraŭnik Biełarusi praviadzie ŭ rabočaj pajezdcy pa Homielskaj vobłaści, paviedamlaje aficyjny sajt kiraŭnika dziaržavy.
Łukašenka naradziŭsia 30 žniŭnia 1954 hoda ŭ haradskim pasiołku Kopyś Aršanskaha rajona Viciebskaj vobłaści, biełarus.
Zakončyŭ dźvie vyšejšyja navučalnyja ŭstanovy — Mahiloŭski dziaržuniviersitet imia A.Kulašova (1975) i Biełaruskuju sielskahaspadarčuju akademiju (1985). Historyk, ekanamist.
U 1975–1977 hadach, a zatym u 1980–1982 hadach słužyŭ u Savieckaj Armii. Paśla słužby pracavaŭ u kamsamolskich i partyjnych orhanach, byŭ na haspadarčaj pracy na pasadach namieśnika i kiraŭnika pradpryjemstvaŭ pramysłovaści budmateryjałaŭ i APK BSSR. U 1990 hodzie byŭ abrany deputatam Viarchoŭnaha Savieta.
10 lipienia 1994 hoda Łukašenka abirajecca pieršym prezidentam Biełarusi, atrymaŭšy bolš za 80% hałasoŭ vybarščykaŭ.
U nastupnyja dva hady, 1995–1996, ź jaho inicyjatyvy prajšli dva respublikanskija refierendumy, jakija zaćvierdzili dziaržaŭnaje dvuchmoŭje ŭ Biełarusi, novyja dziaržaŭnyja simvały i vyznačyli kanstytucyjny ład krainy.
U vieraśni 2001 hoda Łukašenka paŭtorna abirajecca prezidentam. Pavodle źviestak CVK, za jaho prahałasavała 75,65% vybarščykaŭ.
U 2004 hodu prezident inicyjavaŭ refierendum pa admienie artykuła Kanstytucyi, zhodna ź jakim adna asoba nie maje prava abiracca na post prezidenta bolš za dva razy zapar. Pavodle źviestak CVK, hetuju inicyjatyvu padtrymała bolš za 77% vybarščykaŭ. Takim čynam, Łukašenka atrymaŭ prava na ŭdzieł u nastupnych prezidenckich vybarach.
Na vybarach u sakaviku 2006 hoda Łukašenka, pavodle aficyjnych źviestak, nabraŭ 83% hałasoŭ vybarščykaŭ i byŭ pieraabrany na post kiraŭnika biełaruskaj dziaržavy ŭ treci raz.
Pradstaŭniki biełaruskaj apazicyi i mižnarodnyja naziralniki zafiksavali masavyja parušeńni padčas prezidenckaj kampanii, zajavili ab nieprazrystaści i niedemakratyčnaści vybaraŭ.
