Zatrymany ŭ Biełarusi rotny kamandzir municypalnaj konnaj palicyi pry Vilenskim hałoŭnym kamisaryjacie Łajmanas Bankaŭskas skazaŭ, što jaho adpuścili pa zahadzie kiraŭnika Biełarusi Alaksandra Łukašenki — prynamsi tak jamu skazali biełaruskija słužboŭcy.«Zaprasili ŭ kabiniet, aficyjna pračytali viersiju pra toje, što heta «dobraachvotny žest našaha prezidenta, z hetaj chviliny ja volny», — raskazaŭ Bankaŭskas žurnalistam telebačańnia Lietuvos rytas.
Jon śćviardžaje, što narkotyki, za jakija jaho zatrymali, jamu padkinuli. Bankaŭskas maje namier supracoŭničać sa słužboŭcami, jakija buduć pravodzić unutranaje rasśledavańnie.
«Realna tak i pavinnyja zrabić (pačać rasśledavańnie), Bo heta nie šarahovaje zdareńnie, ja dumaju, ułady pavinnyja reahavać, ja sapraŭdy ničoha nie chavaju, čym zmahu, tym dapamahu», — skazaŭ Bankaŭskas.
Jon śćviardžaje, što jeździŭ u Biełaruś, 16 hadoŭ i ŭpieršyniu trapiŭ u pole zroku biełaruskich słužboŭcaŭ tolki ŭ pačatku žniŭnia 2010. Tady jaho nibyta adpuścili, a praz paru tydniaŭ niekalki hadzinaŭ abšukvali jahonuju mašynu i pakazali «znachodku» — narkotyki.
Bankaŭskas byŭ zatrymany ŭ Biełarusi 16 žniŭnia. Biełaruskaja pravaachoŭniki paviedamili, što ŭ jaho mašynie znajšli 45,5 h mietamfietaminu. Jaho vypuścili 25 žniŭnia.