U centry Lidy pa vulicy Haharyna jašče da pierabudovy pačali ŭzvodzić vialiki i pryhožy basiejn. Adnak papłavać u im lidčukam nie daviałosia: budaŭnictva nie skončyli, tolki pakinuli vialiki pusty budynak na radaść miascovym biesprytulnym.
Moładź taksama znajšła «karyść» ad pustoha budynka, pieraŭtvaryŭšy jaho ŭ pryton.
«Tam źbirajucca padletki, palać, pjuć, seksam zajmajucca, narkotykami bałujucca. Usio heta ŭ adkrytuju. Usie pra heta viedajuć. — skardzicca adzin z žycharoŭ horada Lida, Mikoła Hryncevič, —
My dumali moža źniasuć hety pryton ci pierabudujuć pierad Dažynkami. Ale jaho nakryli biełym savanam, niby tam kazačny pałac. Ja nazvaŭ heta «viarciep pad biełym savanam».
U rajvykankamie nam paviedamili, što siońnia hetaje pamiaškańnie maje ŭžo svajho ŭłaśnika — kampaniju «Jeŭratorh», jakaja płanuje pierabudavać basiejn u novuju vielmi patrebnuju horadu kramu.
«Budaŭnictva płanujecca pačać adrazu paśla Dažynak. — tłumačyć pradstaŭnik kampanii „Jeŭratorh“ Vital Źmitrovič.— Ci budzie heta dvuchpaviarchovaja krama ci nie, pakul nie mahu skazać. Adnak handlovaja płošča płanujecca kala 1 tys.kv. mietraŭ i pradavacca tam buduć tavary paŭsiadzionnaha popytu. Na dadzieny momant budynak nakryli śpiecyjalaj pokryŭkaj z malunkam, kab jon nie kidaŭsia ŭ vočy z vulicy».
Zhodna z płanami, novaja krama na vulicy Haharyna budzie zdadzienaja ŭ žniŭni 2011 hoda. A praz hod kampanija «Jeŭratorh» płanuje adkryć jašče i hipiermarkiet u Lidzie, dzie buduć pradavacca i budmateryjały, i adzieńnie, i pradukty, i budzie ułasnaja piakarnia. Dla novaha hipiermarkieta kampanija ŭžo vykupiła 4 hiektary ziamli i płanuje, što handlovaja płošča kramy składzie 4–4.5 tys.kv.m.
Pakul abodva prajekty kampanii «Jeŭratorh» na stadyi raspracoŭki dakumientacyi. Adnak Vital Źmitrovič zapeŭnivaje, što voś projduć «Dažynki» i pačniecca budaŭnictva. Spadziajemsia, što takim čynam źniknie «lidski viarciep pad biełym savanam».
