Śpisy zabaronienych u Biełarusi narkatyčnych rečyvaŭ papoŭnili 24 prekursory i 21 asabliva niebiaśpiečnaje psichatropnaje rečyva.
Hetaja miera zamacavana pastanovaj Ministerstva achovy zdaroŭja ad 6 vieraśnia 2010 hoda № 113 «Ab uniasieńni źmianieńniaŭ i dapaŭnieńniaŭ u pastanovu Ministerstva achovy zdaroŭja ad 28 maja 2003 hoda № 26».
Akramia hetaha, jak paviedamlaje pres-słužba MUS Biełarusi, padkantrolnymi stali jašče try raśliny, jakija ŭtrymlivajuć psichatropnyja rečyvy salvinaryn, A i erhamietryn. U lik zabaronienych, u pryvatnaści, uniesieny listy šałfieju pradkazalnikaŭ, nasieńnie havajskaj ružy, a taksama kvietki i listy błakitnaha łotasa.
Śpis zabaronienych u Biełarusi narkatyčnych rečyvaŭ byŭ pašyrany pa inicyjatyvie orhanaŭ unutranych spraŭ. Nahadajem, u studzieni i sakaviku hetaha hoda ŭ Respublikanski pieralik asabliva niebiaśpiečnych narkatyčnych srodkaŭ i psichatropnych rečyvaŭ, jakija padlahajuć dziaržaŭnamu kantrolu, byli ŭklučany 27 psichatropaŭ.
Adnak, pavodle infarmacyi pres-słužby MUS, «narkahandlary dastatkova chutka adaptavalisia da ŭviedzienaj zabarony i stali raspaŭsiudžvać raniej nieviadomyja i nie zabaronienyja na terytoryi Biełarusi psichatropnyja paraški i sumiesi». Kab nie dapuścić ich masavaha raspaŭsiudžvańnia, MUS čarhovy raz chadajničała pierad Ministerstvam achovy zdaroŭja ab pašyreńni pieraliku.
«Prablema narkatyzacyi biełaruskaha hramadstva z kožnym hodam stanovicca ŭsio bolš aktualnaj», — adznačajecca ŭ paviedamleńni pres-słužby. Prahresujučaja dynamika hetaha pracesu patrabuje ad MUS pastajannaha pošuku novych form i mietadaŭ procidziejańnia niezakonnamu abarotu narkotykaŭ.
Taćciana Daraščonak, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH