Admoŭnaje salda zamiežnaha handlu dasiahnuła amal $3 młrd za 7 miesiacaŭ 1
Za lipień hety pakazčyk pavialičyŭsia amal na 500 młn, choć u paraŭnańni sa studzieniem-lipieniem minułaha hoda — źniziŭsia na $300 młn.
U studzieni-lipieni 2010 hoda admoŭnaje salda źniešniaha handlu tavarami i pasłuhami, raźličanaje pavodle mietadałohii płaciežnaha bałansu, skłała 2 młrd. 933,7 młn. dołaraŭ, paviedamlaje Nacyjanalny statystyčny kamitet. Za lipień hety pakazčyk pavialičyŭsia amal na 500 młn. dołaraŭ, choć u paraŭnańni sa studzieniem-lipieniem minułaha hoda — źniziŭsia na 300 młn. dołaraŭ.
Abjom źniešniaha handlu tavarami i pasłuhami skłaŭ 34,5 młrd. dołaraŭ, što na 18,5% bolš, čym u studzieni-lipieni 2009 hoda, u tym liku ekspart — 15,8 młrd. (na 22,2% bolš), impart — 18,7 młrd. (na 15,6% bolš). Pavodle prahnozu sacyjalna-ekanamičnaha raźvićcia admoŭnaje salda handlu tavarami i pasłuhami ŭ 2010 hodzie pavinna skłaści 4,6–4,7 młrd. dołaraŭ.
Zhodna ź mietadałohijaj handlovaha bałansu, što ŭličvaje źviestki Dziaržaŭnaha mytnaha kamiteta, u studzieni-lipieni 2010 hoda admoŭnaje salda źniešniaha handlu tavarami skłała 4 młrd. 201,1 młn. dołaraŭ (u studzieni-lipieni 2009 hoda — 4 młrd. 291,3 młn.).
Za siem miesiacaŭ hoda ŭ Biełaruś uvieziena pramiežkavych tavaraŭ (enierhanośbity, syravina, materyjały i kamplektavalnyja) na 12 młrd. 952 młn. dołaraŭ (na 15,9% bolš, čym za taki ž pieryjad 2009 hoda). Ekspart pramiežkavych tavaraŭ skłaŭ 8 młrd. 409,9 młn. dołaraŭ, pavialičyŭšysia na 9,2%. 38,4% vartasnaha abjomu ekspartu i 45,3% impartu pramiežkavych tavaraŭ skłali tavary enierhietyčnyja. Na źniešni rynak ich pastaŭlena na 3 młrd. 231,3 młn. dołaraŭ, što na 21,2% mienš, čym u studzieni-lipieni 2009 hoda. Impart enierhietyčnych tavaraŭ skłaŭ 5 młrd. 871,9 młn. dołaraŭ, što na 2,3% mienš za ŭzrovień minułaha hoda. Salda źniešniaha handlu enierhanośbitami skłałasia admoŭnaje ŭ pamiery 2 młrd. 640,6 młn. dołaraŭ.
Stanoŭčaje salda handlu spažyvieckimi tavarami ŭ studzieni-lipieni 2010 hoda dasiahnuła 100,4 młn. dołaraŭ (u studzieni-lipieni 2009 hoda — minus 269,7 młn. dołaraŭ).
