Vilnia, 17 vieraśnia 2009 hoda.
U sieradu, 20 kastryčnika, Minsk z aficyjnym vizitam naviedaje prezident Litvy Dala Hrybaŭskajcie.
Płanujecca, što pieramovy Łukašenki i Hrybaŭskajcie projduć u vuzkim i pašyranym składach. Asnoŭnaj ich temaj stanie raźvićcio handlova-ekanamičnaha supracoŭnictva. Kiraŭniki dziaržavaŭ abmianiajucca dumkami pa aktualnych pytańniach mižnarodnaha paradku dnia. Akramia taho, miarkujecca, što pa vynikach pieramovaŭ budzie padpisany šerah dvuchbakovych dakumientaŭ, paviedamlaje sajt biełaruskaha kiraŭnika.
15 kastryčnika Łukašenka ŭ intervju haziecie "Litovskij kuŕjer" adznačyŭ, što ŭzajemadziejańnie ź Biełaruśsiu ŭ ekanamičnaj śfiery "moža prynieści vielizarnyja dyvidendy dla ekanomiki Litvy, dla dabrabytu našych litoŭskich siabroŭ".
"Jašče što vielmi važna: my ž ź luboŭju da vas stavimsia. Ja mnohich litoŭcaŭ viedaju.
Dla mianie što biełarusy, što ruskija, što litoŭcy — adno i toje ž. Naš narod nastolki talerantny i internacyjanalny, što litoŭcam i žadać inšaha nie treba.
My hatovy da ŭliku lubych intaresaŭ", — skazaŭ biełaruski prezident.
Łukašenka padkreśliŭ, što Biełaruś i Litva mohuć da kanca hoda padpisać pahadnieńnie ab uzajemnych pajezdkach žycharoŭ pryhraničnych terytoryj. Pavodle jaho słoŭ, Biełaruś sa svajho boku hatova da padpisańnia hetaha pahadnieńnia, ciapier — krok za litoŭskim bokam. "My svoj šlach prajšli. Bolš za toje, my pryniali varyjant Litvy. Voś jak litoŭcy prapanavali, tak my i pryniali hety dahavor. Jakija pytańni da nas? Jak tolki vy budziecie hatovy, my padpišam dakumient", — skazaŭ Łukašenka.
Kiraŭnik Biełarusi naviedvaŭ Litvu z aficyjnymi vizitami ŭ 1995 i 2009 hadach. U vieraśni minułaha hoda padčas vizitu ŭ Vilnius Łukašenka zaprasiŭ Hrybaŭskajcie naviedać Biełaruś ź vizitam u adkaz, dadaje BiełaPAN.
