Ministry zamiežnych spravaŭ Hiermanii i Polščy Hida Vestervele i Radasłaŭ Sikorski paabiacali Łukašenku 3 miljardy jeŭra ŭ vypadku spraviadlivych vybaraŭ.
Fota Julii Daraškievič
2 listapada Minsk naviedali adrazu dva kiraŭniki MZS krainaŭ Jeŭrasajuza. Było vidavočna, što Vestervele j Sikorski pryjechali ŭ Biełaruś, kab davieści pazicyju ES adnosna vybaraŭ. Čakańni paćvierdzilisia.
Ź ministrami pryjechaŭ śviet žurnalistaŭ — što niamieckich, što polskich. Značyć, u hetych krainach vizit razhladajuć važnym.
«Kali Łukašenka praviadzie sumlennyja vybary, Biełaruś moža atrymać ad ES 3 młrd jeŭra», — u łob zajaviŭ ministr zamiežnych spraŭ Polščy Radasłaŭ Sikorski.
Na čym hruntujucca takija raźliki? Sikorski adznačyŭ, što jany bazujucca na toj dapamozie, što Jeŭrasajuz akazvaje Małdovie. Ciaham dvuch hadoŭ hetaja postsavieckaja kraina musić atrymać 2 miljardy jeŭra. «A pakolki Biełaruś bolšaja kraina, to i dapamoha musić być bolšaj», — zaznačyŭ polski dypłamat.
Krynicami atrymańnia hetych finansaŭ moža być Mižnarodny valutny fond, Jeŭrapiejski inviestycyjny bank, Jeŭrapiejski bank rekanstrukcyi i raźvićcia, makrakredyty. Nie abminuŭ Sikorski mahčymaści nahadać, što papiarednija kredyty byli vydzielenyja Biełarusi padčas kiraŭnictva Jeŭrapiejskim departamientam MVF palakam Markam Belkam. Hida Vestervele kankretnuju ličbu nazyvać nie śpiašaŭsia, ale pahadziŭsia, što dapamoha budzie.
«Havorka pra jakaść, a nie vynik vybaraŭ», — akcentavaŭ uvahu Sikorski.Hetyja słovy paŭtaralisia ŭvieś čas.
«Prezident Biełarusi nam siońnia klatvienna paabiacaŭ, što vybary projduć sumlenna. My pavieryli jamu na słova», — zajaviŭ kiraŭnik polskaha zamiežnapalityčnaha viedamstva.
Łukašenka ž publična zaniaŭ tuju ž pazicyju, što i na niadaŭniaj sustrečy z prezidentkaj Litvy Dalaj Hrybaŭskajcie. Maŭlaŭ, i raniej nijakich parušeńniaŭ nie było — nie budzie i na hety raz. «Nikoli ŭ našaj krainie nie było, kab parłamient i prezidenta vybirali niedemakratyčna, — zapeŭniŭ jon. — Hetyja vybary buduć demakratyčnymi, bo vy hetaha chočacie».
A ci hatovy Łukašenka sapraŭdy da vykanańnia takich abaviazkaŭ? «Pa pładach ich paznajecie ich», — cytataj ź Biblii adkazaŭ niamiecki ministr.
Sikorski taksama zaznačyŭ, što siońnia pryniaŭ palityčnaje rašeńnie adklikać vieta na ŭdzieł Biełarusi ŭ «Paŭnočnym supracoŭnictvie» Jeŭrasajuza.
«Most u Jeŭropu staić na troch aporach: demakratyja, pravy čałavieka i svabodnyja vybary. Dla Biełarusi ŭ Jeŭropu — adzin šlach, i jon viadzie praz spraviadlivyja vybary», — ličyć Vesterviele.
Cikavilisia žurnalisty, ci abmiarkoŭvałasia ekanamičnaje supracoŭnictva. Ale ministry adkazali, što meta vizitu była trochu inšaj, a ekanamičnaje palapšeńnie taksama budzie ŭ vypadku demakratyčnych vybaraŭ.
Viadoma, što Radasłaŭ Sikorski vioŭ pieramovy nakont polskaj mienšaści ŭ Biełarusi, spynieńnie represij suprać ich. Fakt pieramovaŭ byŭ paćvierdžany, ale ci pryjšli baki da jakoha zhody, nie paviedamlałasia.
Ministry demanstratyŭna sustrelisia i z apazicyjnymi kandydatami ŭ prezidenty.
Na sustreču ŭ hatel «Jeŭropa» byli zaprošanyja siamiora demakratyčnych pretendentaŭ i Alaksandr Milinkievič.
«Samaje hałoŭnaje, što my nie zastalisia adny ŭ takich składanych umovach, što skłalisia apošnim časam. Niajasnaja ciapier pazicyja Rasii, choć zusim niadaŭna jana była absalutna zrazumiełaj. Padtrymka Jeŭropy vielmi važnaja», — skazaŭ pa sustrečy lider kampanii «Havary praŭdu» Uładzimir Niaklajeŭ.
«Hetyja krainy nie pieršy hod nazirajuć za situacyjaj u Biełarusi. My zaznačyli, što nielha vieryć abiacańniam, bo toje, što adbyvajecca, supiarečyć im. Ja ŭźniaŭ pytańnie, ci moža Jarmošyna ŭznačalvać CVK», — zaznačyŭ kaardynatar «Jeŭrpiejskaj Biełarusi» Andrej Sańnikaŭ.
Možna skazać, što
amal usie ad vizitu zastalisia zadavolenymi. Jeŭrapiejskija ministry pačuli abiacańnie spraviadlivych vybaraŭ, Łukašenka — ab mahčymaści pryznańnia, apazicyja — ab dalejšaj padtrymcy. Zrešty, pakul usie abiacańni trymajucca tolki na słovie.
