Niaŭdały biznes łatvijskich miljanieraŭ u Biełarusi

U Łatvii kryzisny hod na 20% abnaviŭ top-100 samych bahatych biznesoŭcaŭ i pamienšyŭ ich sukupny kapitał na 220 młn łataŭ (zvyš 427 młn dalaraŭ). Kolkaść biznes-prajektaŭ łatvijskich miljanieraŭ u Biełarusi nie pavialičyłasia. Bolš stała niaŭdałych sprobaŭ inviestavać u biełaruskuju ekanomiku.

Dastatkova vialiki pieralik tak i nierealizavanych łatvijskimi inviestarami ŭ Biełarusi zadumaŭ papoŭniŭ prajekt druhoha bahacieja Łatvii Kirava Lipmana.

Sukupny kapitał biznesoŭca i jaho žonki Hanny Lipmanie ekśpierty kampanii Baltic Screen, jakija skłali novy rejtynh łatvijskich miljanieraŭ, hetym razam acanili ŭ 54 młn łataŭ (kala 105 młn dalaraŭ). Jaho asnova — ułasnaść u mietałurhičnaj i farmaceŭtyčnaj halinach.

Kiraŭ Lipman źjaŭlajecca adnym z suŭładalnikaŭ lijepajskaha mietałurhičnaha zavoda, jaki viadomy tym, što delehavaŭ na adkryty čempijanat Biełarusi pa chakiei svaju kamandu (Lipman, darečy, uznačalvaje Łatvijskuju fiederacyju chakieja). Ale kali ŭładalnikam kantrolnaha pakieta zavoda ŭ Lijepai źjaŭlajecca biznesoviec, jaki zajmaje treciaje miesca ŭ top-100, — Siarhiej Zacharjin, to ŭ farmaceŭtyčnaj kampanii Grindex Lipman — asnoŭny akcyjanier.

Pačynajučy z 2009 jon aktyŭna vioŭ pieramovy ab nabyćci kantrolnaha pakieta (abo choć by 50% akcyj) adnaho z najbujniejšych farmaceŭtyčnych biełaruskich pradpryjemstvaŭ — Barysaŭskaha zavoda miedpreparataŭ. Pieramovy aktyvizavalisia paśla akcyjanavańnia pradpryjemstva, ale ŭ vyniku zajšli ŭ tupik. Biełaruski bok admoviŭsia pradavać bujny pakiet, paśla čaho Lipman kupiŭ fabryku ŭ Słavakii.

Kiraŭ Lipman — nie adziny ź fihurantaŭ rejtynhu, u jakich nie pajšli spravy ŭ Biełarusi.

U siaredzinie 2000-ch surjozny prajekt ź Biełaruśsiu płanavaŭsia ŭ absalutnaj lidara łatvijskaha top-100, ventśpiłskaha mera i ŭpłyvovaha palityka Ajvara Lembierhsa. Pa vynikach 2009 hoda kapitał biznesoŭca i jaho dziaciej acenieny ŭ 180 młn łataŭ (kala 350 młn dalaraŭ).

U 2004 — 2005 Lembierhs jak adzin z suŭładalnikaŭ najbujniejšaha tranzitnaha chołdynhu Łatvii LSF Holdings byŭ hatovy ŭ abmien na harantavanyja abjomy pieravałki hruzaŭ (kalija, naftapraduktaŭ) ź Biełarusi biaspłatna addać biełarusam terminał pa pieravałcy nasypnych hruzaŭ u Ventśpiłsie. Kantrolny pakiet, zhodna z padadzienym łatvijskij bokam biznes-płanam, pierajšoŭ by da «Biełaruśkalija». Ci to praz dadatkovyja ŭmovy, jakija vysoŭvali ŭładalniki LSF Holdings biełaruskamu boku, ci to praz unutranyja roznahałośsi, jakija pryviali ŭ minułym hodzie da adkrytaha kanfliktu suŭładalnikaŭ chołdynhu, hety prajekt nie adbyŭsia. Biełarusy pieraaryjentavali asnoŭnyja abjomy pieravałki kaliju na litoŭskuju Kłajpiedu.

Ź inšych łatvijskich biznesoŭcaŭ, jakija majuć u svajoj praktycy niaŭdały dośvied inviestavańnia ŭ Biełaruś, možna nazvać Vasila Mielnika i Hunara Kirsansa.

Vasil Mielnik sprabavaŭ stvaryć sumiesnaje pradpryjemstva ź minskaj šviejnaj fabrykaj «Alesia». U 2004 było navat zarehistravana SP «Ohre — Alesia», ale prajekt tak i nie byŭ realizavany praź niežadańnie biełaruskaha boku rasstavacca z kantrolnym pakietam.

Nacyjanalny biznes-simvał, jak jaho nazyvajuć u Łatvii, uładalnik sietki bistro Lido Hunar Kirsons znajšoŭ sabie partniora ŭ Biełarusi ŭ asobie Upraŭleńnia spravami prezidenta. U vyniku ŭ Minsku adkryłasia bistro, vielmi padobnaje i pa kancepcyi, i pa brendzie z ŭstanovami Kirsansa, da jakoha jon, adnak, nie maje nijakaha dačynieńnia. Zrešty, u Kirsansa chapaje prablem i ŭ siabie na radzimie — jon faktyčna na miažy bankructva. Pa paviedamleńniach łatvijskich dziełavych ŚMI, biznesoviec navat pačaŭ raspradavać asabistuju majomaść, uklučajučy park darahich aŭtamabilaŭ.

Chto moža pakul zapisać sabie pracu ŭ Biełarusi ŭ aktyŭ, dyk heta hałoŭny akcyjanier Rietumu banka Leanid Esterkin. U topie-100 łatvijskich miljanieraŭ jon zaniaŭ 4-je miesca z kapitałam 53 młn łataŭ (amal 103 młn dalaraŭ).

Na biełaruskim rynku biznes Esterkina publična prysutničaje z 2001 hoda, kali było zarehistravanaje pradstaŭnictva Rietumu banka ŭ Biełarusi.

U 2008 hodzie łatvijski biznesoviec nabyŭ i svaje pieršyja aktyvy — jon kupiŭ 50% kapitału lizinhavaj hrupy «ViestLizinh», u jakuju ŭvachodziać TAA «ViestLizinh» (aŭtalizinh) i TAA «Viesttransinviest» (pasłuhi lizinhu budaŭničaj i darožnaj techniki, hruzavoha i pasažyrskaha aŭtatranspartu, pramysłovaha i budaŭničaha abstalavańnia).

U hetym hodzie Esterkin zrabiŭ jašče adno pryraščeńnie — za 100 dalaraŭ jon nabyŭ u Biełarusi lizinhavuju kampaniju Parex lizing, niekali zasnavanuju łatvijskim Parex banka, jaki zbankrutavaŭ padčas kryzisu.

Sto dalaraŭ — vielmi simvaličnaja suma. Paraŭnoŭvajučy abjomy inviestycyj (u asablivaści niepasrednych), jakija ŭkładajuć u biełaruskuju ekanomiku najbližejšyja susiedzi našaj krainy, varta pryznać, što łatvijski biznes daloka adstaje ad astatnich — rasijcaŭ, palakaŭ, ukraincaŭ i litoŭcaŭ.

0

0

0

0

0

0

zautra.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH