10 śniežnia ŭ Homieli dva nieviadomyja mužčyny napali na ŭdzielnikaŭ pikieta, jakija ahitavali za kandydata ŭ prezidenty Alaksandra Łukašenku.
Jak paviedamiŭ miascovy aktyvist Juryj Zacharanka, incydent adbyŭsia ŭ centry horada, kala ŭniviermaha «Homiel», dzie ŭ adzin šerah stajali pikiety, jakija ahitavali za demakratyčnych kandydataŭ Vitala Rymašeŭskaha, Mikałaja Statkieviča, Andreja Sańnikava i Uładzimira Niaklajeva. Pobač ź imi pikiet u padtrymku Łukašenki arhanizavali členy Biełaruskaha respublikanskaha sajuza moładzi.
«Mužčyna va ŭzroście, z vyhladu na padpitku, prajšoŭ mima nas i, ŭbačyŭšy partret Alaksandra Łukašenki, ź jakim stajali dva maładyja chłopcy, nakiravaŭsia da ich, — paviedamiŭ aktyvist. —
Spačatku jon prosta plunuŭ u bok aktyvistaŭ BRSM, a potym, kali padyšoŭ jaho znajomy, taksama z vyhladu na padpitku, mužčyna schapiŭ płastykavy stend i parakuliŭ.
Ź jaho vypaŭ papiarovy partret dziejnaha prezidenta. Adzin z chulihanaŭ padniaŭ jaho i razarvaŭ na častki».
«Mužčyna rvaŭ partret prezidenta sa słovami: «jon nam žyć pieraškadžaje», — udakładnili aktyvisty BRSM.
Pikietčyki vyklikali milicyju, ale napadnikam udałosia ŭciačy. Prybyŭšyja milicyjaniery apytali členaŭ BRSM i vyklikali patrul dla pastajannaha dziažurstva na miescy pikieta ŭ padtrymku Łukašenki, kab praduchilić takija incydenty.
Milicyjaniery viaduć pošuk złamyśnikaŭ.