Zaviaršyŭsia vizyt Alaksandra Łukašenki ŭ Tehieran. Biełaruski kiraŭnik sustreŭsia z prezydentam Mahmudam Achmadynedžadam i čałaviekam, jaki ŭ Iranie staić vyšej za prezydenta – najvyšejšym lideram Isłamskaj revalucyi Ali Chamenei.
Prezydenty Biełarusi i Iranu padpisali supolny kamunikat ab raźvićci ŭzajeminaŭ. Taksama ŭ prysutnaści A.Łukašenki i M.Achmadynedžada byli padpisanyja niekatoryja damovy ab ekanamičnym supracoŭnictvie.
A.Łukašenka zaklikaŭ davieści tavarazvarot miž dźviuma krainami da miljarda dalaraŭ štohod. Praŭda, meta vyhladaje niedasiažnaju, bo pra pašyreńnie handlu miž dźviuma kra¬inami havorycca daŭno, A.Łukašenka ŭ Tehieranie nia pieršy raz, a papiaredni iranski prezydent byvaŭ u Miensku, adnak handal za minuły hod skłaŭ usiaho 38 młn dalaraŭ. Naftu j haz ź Iranu Biełarusi niama jak pampavać, a z rešty tavaraŭ nas tradycyjna cikavili chiba što finiki. Voś biełaruskija zapasy zbroi vajaŭničamu Iranu prydalisia b. Dy tolki jany za apošnija hady rastali. Kompleksy S-300, atrymanyja ad Rasiei, Biełaruś nia maje prava pierapradać. Prynamsi, biaz zhody Rasiei. A Tehieran taho chacieŭ by.
Iranskamu i biełaruskamu lideram zastałosia kanstatavać najaŭnaść palityčnaj bazy dla zbližeńnia. Jak paviedamiła iranskaje ahienctva IRNA, Ali Chamenei zaklikaŭ A.Łukašenku supolna procistajać cisku suśvietnych superdziaržavaŭ, u pryvatnaści, ZŠA. U hetym kiraŭniki Iranu ź Biełaruśsiu majstry.
Varta adznačyć, što duchoŭnaha lidera Iranu pryznačajuć imamy, a narod nie vybiraje. Zachodniuju systemu demakratyi i svabodaŭ adkidaje i biełaruski režym. Demakratyčnyja krainy aścierahajucca Iranu bolš za Biełaruś tamu, što Tehieran maryć pra ŭłasnuju atamnuju zbroju i admaŭlajecca spynić raspracoŭki. Prezydent Iranu adkryta vykazvaŭ žadańnie ścierci Izrail z mapy śvietu. Tamu zachodnija dziaržavy trymajuć na paradku dnia pytańnie ab uviadzieńni antyatamnych sankcyjaŭ suprać Iranu.
Biełaruś i Iran dalokija ŭ svaich nacyjanalnych intaresach, jak i hieahrafičnym stanoviščy. Hetak, na dniach Tehieran vitaŭ śmiarotny prysud Chusejnu, u Miensku jon vyklikaŭ pratest. Izrail dla Iranu – śmiarotny vorah, tady jak mnohija ŭpłyvovyja biełarusy trymajuć svaje aščadžeńni ŭ izrailskich bankach.
