Sudovaja sprava pa zysku redakcyi časopisa «ARCHE. Pačatak» da Ministerstva infarmacyi skončyłasia siońnia nie na karyść vydańnia. Sudździa Vyšejšaha haspadarčaha suda M. Madudzin abviaściŭ rašeńnie – nie zadavolvać patrabavańniaŭ redakcyi.
«Pakolki była abvieščana tolki rezulatyŭnaja častka, składana skazać, čamu sud pryniaŭ takoje rašeńnie,» - paviedamiła pres-słužbie BAŽ advakat z boku časopisa Anžeła Rajtnier.
«Pierad hetym adbylisia sprečki bakoŭ. My davodzili, što ŭ zakanadaŭstvie nie isnuje normy źmianieńnia tematyki. Da spravy było prykładziena zaklučeńnie ekśpiertyzy doktara fiłałahičnych navuk M. Tyčyny, dzie śćviardžajecca, što časopis nie źmianiaŭ svajoj tematyki. Taksama padkreślivałasia, što infarmavańnie rehistrujučaha orhana ab źmianieńni tematyki – prerahatyva zasnavalnika, a nie redakcyi. Pradstaŭniki Ministerstva infarmacyi śćviardžali, što zakanadaŭstva niedaskanałaje i časam idzie ŭ razrez z praktykaj. Ale nielha dazvolić, kab vydańnie samavolna źmianiała tematyku, maŭlaŭ, heta stvoryć drenny precedent,» -- raspaviała A. Rajtnier.
Hałoŭny redaktar časopisa «ARCHE» Valery Bułhakaŭ vykazaŭ svajo ŭražańnie: «Naša advakat paŭtaryła svaje arhumienty, što redakcyja nie ździajśniała pravaparušeńnia. Aprača taho zaklučeńnie ekśpiertyzy Nacyjanalnaj knižnaj pałaty nie vytrymlivaje nijakaj krytyki. Pradstaŭniki Mininfarmacyi śćviardžali, što drukavanyja ŚMI akramia Zakona ab druku pavinny prytrymlivacca taksama i zakanadaŭstva ab vydavieckaj dziejnaści, pakolki paśviedčańnie ab rehistracyi – heta jašče licenzija na vydaviectva drukavanaj pradukcyi. Uvohule ich vystupleńnie było vielmi karotkim, dzieści chvilin piać. U toj čas naša advakat źmiastoŭna adstojvała pazicyju chvilin dvaccać. Sud pryniaŭ rašeńnie taksama vielmi chutka.»
Aleś Ancipienka, fiłosaf, kiraŭnik «Biełaruskaha Kalehijumu» tak prakamientavaŭ vynik sudovaj spravy: «Heta aznačaje, što «ARCHE» stračvaje mažlivaść raspaŭsiudžvacca praz padpisku. Taksama heta jašče adzin krok uładaŭ da tatalnaha vydaleńnia niedziaržaŭnych miedyjaŭ z publičnaj prastory.»
Vykazaŭ svajo mierkavańnie Valancin Akudovič, fiłosaf, adzin z aŭtaraŭ časopisu: « Na moj pohlad, sprava z «ARCHE» vyrašana. Časopisu nie daduć akryjać paśla hetaj «spłanavanaj akcyi» – adłučeńnia ad čytača na try miesiacy. Chutčej, dzieści «naviersie» vyrašyli: «Pahulali chłopcy ŭ časopis i libieralizm – chopić, čas začyniać». Zaraz ułada navučyłasia rabić heta biez verchału, pastupova: spačatku vykinuli z šapikaŭ, potym z kniharniaŭ, zaraz prypynili na try miesiacy. Na hetym nie skončycca – naša ŭłada, jak buldoh, kali ŭčepicca – nie adpuścić. Toje, što redakcyja padavała pazoŭ, pravilna. Zaraz jany mohuć skazać i sabie, i čytačam: «My zrabili ŭsio, što mahli, ale nijakaja praŭda nie dapamahła». Ja b vielmi chacieŭ pamylicca ŭ svaim mierkavańni i praz tyja try miesiacy trymać u rukach nastupny numar «ARCHE». Ale navat, kali takoje zdarycca, to nienadoŭha, bo «ARCHE» nie moža źmianicca i pačać abychodzić vostryja pytańni, a ŭłada pakazała, što nie namierana bolš heta tryvać. Nie baču chepi-endu.»
Nahadajem, 19 vieraśnia zahadam ministra infarmacyi byŭ prypynieny na try miesiacy vychad časopisa «ARCHE». Mininfarmacyi śćviardžaje, što, nadrukavaŭšy artykuły hramadska-palityčnaha charaktaru, časopis źmianiŭ tematyku i nie paviedamiŭ ab hetym svoječasova dla ŭniasieńnia adpaviednaha źmianieńnia ŭ rehistracyjnaje paśviedčańnie. Redakcyja časopisa «ARCHE» źviarnułasia ŭ sud z patrabavańniem da Mininfarmacyi admianić hetyja papiaredžańnie i zahad. Kalektyŭ časopisa ŭ svajoj zyskavaj zajavie spasyłaŭsia na Zakon ab druku, dzie vyznačana, što padčas rehistracyi vydańnia ŭkazvajecca prykładnaja, a nie dakładnaja tematyka.
