U centry Bahdadu ŭ aŭtorak było ŭčynienaje masavaje vykradańnie. Z ustanovy Ministerstva vyšejšaj adukacyi byli vykradzienyja kala 125 mužčynaŭ, paviedamlaje BBC.
Pavodle słovaŭ vidavočcaŭ, vykradalnikaŭ było kala 80, jany byli apranutyja ŭ formu specpadraździaleńniaŭ ministra ŭnutranych spraŭ. Jany padjechali da budynku na dvaccaci pikapach i pierakryli darohi.
Žančynam było zahadana sabracca ŭ adnym pakoi, a mužčynam, u liku jakich byli supracoŭniki, achoŭniki j naviedniki, – u inšym. Zatym mužčynam, siarod jakich byli jak šyity, tak i sunity, uździeli kajdanki j źvieźli ŭ nieviadomym kirunku.
Miž tym Reuters paviedamlaje, što bajeviki źvieźli tolki irakcaŭ-sunitaŭ. Pavodle źviestak infarmatara ahienctva, napadniki praviarali ŭ ludziej dakumenty, kab adłučyć sunitaŭ ad šyitaŭ.
Usia aperacyja zaniała kala 20 chvilinaŭ.
Kiraŭnik kamitetu pa adukacyi irackaha parlamentu Ałaa Maki pierarvaŭ tranślacyju pa televizii pasiedžańnia zakanadaŭčaha schodu i abjaviŭ pra zdareńnie, a taksama zaklikaŭ premjer-ministra krainy i ministraŭ abarony i ŭnutranych spraŭ terminova adreahavać na zdareńnie, jakoje jon nazvaŭ «nacyjanalnaj katastrofaj».
Ministar vyšejšaj adukacyi Abed Tejiab zahadaŭ začynić usie ŭniversytety j madernizavać systemy biaśpieki ŭ navučalnych ustanovach. «Ja nie chaču, kab prafesary znoŭ hinuli», – skazaŭ jon i dadaŭ, što i raniej prasiŭ ministerstvy abarony i ŭnutranych spraŭ abaranić universytety i ŭpravy, jakija adnosiacca da jahonaha viedamstva.
