Sud Kastryčnickaha rajonu Miensku pastanaviŭ, što adbyvać pakarańnie były dyrektar himnazii Aleh Badałaŭ budzie ŭ kalonii ŭzmocnienaha režymu. Ad 27 lipienia jaho trymajuć pad vartaj. Dyrektara abvinavacili ŭ atrymańni 4 tysiač eŭra chabaru za ŭładkavańnie dziaciej u himnaziju, dzie vučycca ŭnučka Alaksandra Łukašenki j dzieci vysokapastaŭlenych čynoŭnikaŭ.
U sudzie Kastryčnickaha rajonu padčas razhladu kryminalnaj spravy Aleha Badałava vyśvietliłasia, što były dyrektar elitnaj himnazii nieadnojčy atrymlivaŭ chabar za ŭładkavańnie dziaciej. Ale padstavaj dla aryštu nastaŭnika staŭ chabar 4000 eŭra, jakija jamu pieradaŭ hramadzianin Małdovy, kab uładkavać svaich dziaciej u siomuju i vośmuju klasy.
Konkurs u himnaziju – 2,7 čałavieka na miesca. Čym pryvablivaje baćkoŭ himnazija ŭ mikrarajonie Viaśnianka? Mahčyma, tym, što tam jość basejn, budujucca tenisnyja korty, u klasach kožny vučań maje indyvidualnuju partu.
Ranicaj kala budynku himnazii možna bačyć šmat darahich aŭtamabilaŭ z adpaviednymi numarami. Darečy, dziaržnumar aŭtamabila byłoha dyrektara Aleha Badałava – 0005. Mienčuki j supracoŭniki DAI dobra viedajuć, što mašyny z takimi numarami majuć vysokija čynoŭniki. Mahčyma, tamu kryminalnuju spravu daručyli vieści Mienskaj haradzkoj prakuratury, jakaja zajmajecca najbolš važnymi spravami.
Abvinavaŭca ad prakuratury prasiŭ pakarać byłoha dyrektara himnazii pazbaŭleńniem voli na 9 hadoŭ. Kiraŭnik śledztva Siarhiej Ivanoŭ, daviedaŭšysia, što Badałava asudzili na 8 hadoŭ źniavoleńnia z kanfiskacyjaj majomaści, patłumačyŭ «Svabodzie», što indyferentna stavicca da prysudaŭ.
(Ivanoŭ: ) «Ja daviedaŭsia pra Badałava dasłoŭna chvilinaŭ dziesiać tamu. Naahuł, indyferentna da hetaha staŭlusia. Ja ničoha nie liču: sud vynies prysud, jamu lepš vidać. Chabar u vykładčyka – tak, pieršy vypadak».
Pavodle kiraŭnika śledztva, sioleta heta pieršaja sprava suprać nastaŭnika za chabarnictva, jakuju raśśledavała haradzkaja prakuratura. Kali b hramadzianin Małdovy nie raspavioŭ znajomamu milicyjantu pra toje, što paniasie chabar dyrektaru himnazii, Aleh Badałaŭ i nadalej pracavaŭ by na svajoj pasadzie. Pavodle prysudu budzie skanfiskavanaja majomaść byłoha dyrektara – aŭtamabil, televizar i ladoŭnia.
Advakat Badałava zajaviŭ, što budzie abskardžvać prysud.
