U aŭtorak lider abjadnanych demakratyčnych siłaŭ Biełarusi Alaksandar Milinkievič inicyjavaŭ vyłučeńnie Alaksandra Kazulina na prestyžnuju premiju Marcina Enałsa, pieršaha hieneralnaha sakratara Amnesty International.
Premija Enałsa jość adnoj z hałoŭnych uznaharodaŭ ruchu za pravy čałavieka. Jaje łaŭreatami stanoviacca ludzi, jakija źjaŭlajucca "symbałami baraćby za pravy čałavieka ŭ krainach, dzie abarona pravoŭ čałavieka i demakratyi pradstaŭlaje saboj niebiaśpiečny vid dziejnaści".
«Mužnaść i rašučaść Alaksandra Kazulina ŭ baraćbie za svaje pravy vyklikaje zachapleńnie. Jaho haładoŭka siońnia źjaŭlajecca symbalem imknieńnia ŭsich biełarusaŭ žyć u svabodnaj demakratyčnaj krainie. Pra jaje pavinien viedać uvieś śviet. Heta ŭznaharoda, pierš za ŭsio, stanie mahutnym mižnarodnym patrabavańniem da režyma ŭ Biełarusi – pačać vyzvaleńnie palitźniavolenych», - skazaŭ Alaksandr Milinkievič.
Premija Marcina Enałsa źŭlajecca ŭnikalnaj supolnaj akcyjaj adzinaccaci viadučych niaŭradavych pravaabarončych arhanizacyj śvietu. U skład žury Premii ŭvachodziać pradstaŭniki Amnesty International, Human Rights Watch, Human Rights First, Mižnarodnaj federacyi pravoŭ čałavieka, Suśvietnaj arhanizacyi suprać katavańniaŭ dy inš.
U 2006 h. laŭreatami premii byli nazvanyja iranski žurnalist Akbar Hiandžy i juryst i adnačasova radyjokamentatar z Zymbabve Arnold Cunha.
Raniej Premijaj Marcina Enałsa byli ŭhanaravanyja: Achtam Nais, Syryja (2005), Lidzija Jusupava, Rasieja (2004), Aliryjo Urybie Muńjos, Kalumbija (2003), Žaklin Mudejna, Čad (2002), arhanizacyja "Pis Bryhiejdz Internešnł" (2001), Imakule Birachieka, Demakratyčnaja Respublika Konha (2000), Nataša Kandzič, Juhasłavija (1999), Ejad El-Sarradž, Palastyna (1998), Samuel Ruiz Harsija, Meksyka (1997), Klement Nvanka, Nihieryja (1996), Asma Džanhir, Pakistan (1995), Chary Vu, Kitaj (1994).
