Vyhladaje na toje, što Brusel usio ž navažyŭsia adabrać u Biełarusi handlovyja preferencyi. Na siońniašnim pasiadžeńni ekspertaŭ pryniataje rašeńnie nie na karyść Miensku.
Sa słoŭ pradstaŭnika presavaj słužby Eŭraźviazu vynikaje: astatniaje — sprava techniki. Pryčym davieści spravu da lahičnaha kanca zaklikaje asabista kamisar EZ u pytańniach handlu Piter Mandelson.
Ale ci nie vyhladaje hety krok trochi, tak by mović, niasvoječasovym?
Aficyjny Miensk, kamentujučy 12 punktaŭ EZ, i tak paśpieŭ užo zakinuć Eŭropie dvurušnictva. Maŭlaŭ, na vusnach — miod, a tym časam robić siniavokaj krainie roznyja paskudztvy.
Ciapier prapahanda atrymaje novy arhument na temu, jakaja vierałomnaja heta Eŭropa...
Miž tym jana prosta dziejničaje pavodle vysłoŭja Pucina: muchi asobna, katlety asobna musiać być.
"U Eŭraźviazu svaja lohika, svoj alharytm prymańnia rašeńniaŭ, — zaznačyŭ u hutarcy sa mnoj palitolah Aleś Łahviniec. — U miežach novaj stratehii padkreślena, što Eŭropa čakaje pazytyŭnych krokaŭ ź biełaruskaha boku. I miač ciapier na pałovie aficyjnaha Miensku".
Zvyš taho, na dumku Łahvinca, u vačoch Bruselu vierahodnaść biełaruskich uładaŭ jak pieramoŭnikaŭ nievysokaja.
I sapraŭdy, ujaviecie: voś siońnia, prykładam, spynili b zachodniki praces pazbaŭleńnia preferencyjaŭ — a nazaŭtra atrymali anučaj pa tvary. I pačuvalisia b poŭnymi durniami.
Heta lahična, skazaŭ mnie, sa svajho boku, palitolah Andrej Fiodaraŭ, kali palityka — u dadzienym vypadku palityka EZ — spałučaje puhu i piernik. Kali na toje pajšło, dyk Brusel krytykavali mienavita z-za adsutnaści dobraj puhi.
Inšaja reč, što skasavańnie preferencyjaŭ jašče nie vyhladaje fatalna pieradvyrašanym, dadaŭ Fiodaraŭ.
Sapraŭdy, Eŭraźviaz užo demanstravaŭ nierašučaść i niepaśladoŭnaść u hetym (i nia tolki ŭ hetym) pytańni.
Tym časam senatar Čarhiniec prazrysta namiaknuŭ, što ŭ vypadku straty handlovych lhotaŭ Biełaruś moža asłabić kantrol na zachodniaj miažy. Čytaj: navadnić Stary Śviet nielehałami.
Raniej takija namioki hučali i na vyšejšym uzroŭni.
Ale jak ty pryadčyniš tuju miažu? "Svaje ž paŭciakajuć!" — pažartavaŭ adzin moj surazmoŭca.
Karaciej, zajava vyhladaje na hoły pijar i naŭrad ci tak užo napałochaje Brusel.
A voś "demarš Mandelsona" moža i padšturchnuć aficyjny Miensk trochi bolej uvažliva pastavicca da 12 punktaŭ Eŭraźviazu. Kali nia ŭsich, to choć niekatorych.
Zrešty, moža stacca i naadvarot. Raspačniecca jašče bolej zaciataja prapahandovaja rytoryka. Niepaźbiežnyja ŭ lubym vypadku ekanamičnyja ciažkaści śpišuć na Milera z Mandelsonam dy na Labiedźku ź Jarašukom. To bok na "Hazprom", Brusel, apazycyju... Asobnym radkom projduć niezaležnyja prafsajuzy, jakija, maŭlaŭ, i naklikali sankcyi svaimi viečnymi skarhami.
