U niadzielu va ŭsich kaściołach Haradzienščyny byŭ začytany aficyjny list da duchavienstva i viernikaŭ staršyni Kanferencyi katalickich biskupaŭ Biełarusi Alaksandra Kaškieviča.
Pasłańnie było napisanaje z nahody vysyłki ź Biełarusi siami ksiandzoŭ i piaci manašak, hramadzianaŭ Polščy. Ułady nie źmianili svajho rašeńnia ab hetym, niahledziačy na chadajnictvy Kaściołu, padmacavanyja tysiačami podpisaŭ viernikaŭ. Hetaje rašeńnie bje pa Haradzienskaj dyjacezii, dzie z 168 śviataroŭ kožny treci — hramadzianin Polščy.
List A.Kaškieviča davoli kankretny i, jak na biełaruskija realii, śmieły. Pa svaim styli jon trochi nahadvaje pasłańni polskaha kardynała Vyšynskaha, jaki ŭ sacyjalistyčnaj Polščy adstojvaŭ niezaležnaść Kaściołu ad dziaržavy. Ni razu za Łukašenki kaścioł nie vystupaŭ z takoj rašučaj krytykaj uładaŭ.
Bp.Kaškievič jak kiraŭnik Kanferencyi biskupaŭ źviartaŭ da ŭładaŭ prośbu pieramianić rašeńnie ab vysyłcy, adnak nie atrymaŭ adkazu z Administracyi prezydenta, havorycca ŭ liście.
Kaškievič zajaviŭ: “Ułada ŭ kaściole ... naležyć biskupu. Zakanadaŭstva krainy taksama pakidaje dyjacezijalnamu biskupu svabodu vybaru pry zaprašeńni na pracu hramadzianaŭ inšych krainaŭ. Tamu ŭmiašańnie zvonku ŭ pravamocnuju dziejnaść dyjacezijalnaha biskupa jość parušeńniem zakonu i parušeńniem svabody kaściołu”.
Staršynia kanferencyi biskupaŭ vykazaŭ svoj pratest i zaklikaŭ duchavienstva i katalikoŭ malicca za vysyłanych ksiandzoŭ.
Nahadajem, što na minułyja vychodnyja biskup Kaškievič padtrymaŭ katalikoŭ-haładoŭnikaŭ u Horadni, jakija dziesiać hadoŭ nie mahli damahčysia dazvołu na budaŭnictva kaściołu. Bp.Kaškievič pachodzić ź Vilenščyny i ličycca lideram polskamoŭnaje płyni ŭ biełaruskim Kaściole.
Z krytykaj uładaŭ vystupiŭ i orhan haradzienskaj kuryi, hazeta "Słova žyćcia".
❏
Hladzi jašče: "Isnujučaja sytuacyja pradyktavała"
