Rasśledavańnie pa fakcie vybuchu, što adbyŭsia 11 krasavika ŭ minskim mietro, moža być zavieršanaje na praciahu dvuch miesiacaŭ. Takuju dumku vykazaŭ 15 krasavika žurnalistam hienieralny prakuror Biełarusi Ryhor Vasilevič, paviedamlaje Pieršy telekanał.
Hienprakuror zaznačyŭ, što złačynstva ŭ staličnym mietro dapamahło raskryć śledstva pa spravie ab vybuchu, jaki adbyŭsia ŭ noč z 3 na 4 lipienia 2008 hoda ŭ Minsku.
U miežach kryminalnaj spravy pa vybuchu 2008 hoda byli apytanyja 854 śviedki, pravierany zvyš 80 tys. abanientaŭ sotavaj suviazi. Pravaachoŭniki praviali 186 ahladaŭ pradmietaŭ i dakumientaŭ, 509 vobyskaŭ, byli ažyćcioŭlenyja 863 ekśpiertyzy. Aprača hetaha 73 čałaviek pravieryli na palihrafie, apytali 117 tys. čałaviek.
Jak paviedamiŭ Vasilevič, praz praceduru daktyłaskapii prajšli bolš jak 2 młn. čałaviek. Adnak adbitki hałoŭnaha padazronaha pa ciapierašniaj spravie nie ŭtrymlivalisia ŭ bazie źviestak. Kali b hetaha čałavieka ŭdałosia daktyłaskapiravać, to terarystyčnaha akta 11 krasavika nie adbyłosia b, tamu što adbitki byli na druhim vybuchovym prystasavańni, jakoje ŭ 2008 hodzie nie spracavała.
Ciapier mienavita daktyłaskapija daje mahčymaść śledstvu źviazać vybuch kala steły ŭ Minsku ŭ 2008 hodzie i terakt na stancyi mietro «Kastryčnickaja» ŭ krasaviku 2011 hoda.
«Čamu jość upeŭnienaść, što hetaja asoba ździejśniła vybuch, tamu što zastalisia adbitki palcaŭ na tym vybuchovym prystasavańni, jakoje nie spracavała (u 2008 hodzie. — BiełaPAN.), druhaja ekśpiertyza. Heta značyć, aprača pryznańnia ŭsio śviedčyć pra toje, što hety čałaviek u 2008 hodzie ažyćciaviŭ toj vybuch», — rastłumačyŭ hienprakuror.
