Užo tradycyjna bližej da leta na minskim rynku arendy žylla nazirajecca aktyŭnaść uładalnikaŭ kvater, jakija štohod zdajuć u najom svaje žyłyja pamiaškańni časova na 3–4 miesiacy. Heta tak zvanaje siezonnaje žyllo, jakoje zdajecca na toj čas, pakul haspadary žyvuć na dačach.
Źjavilisia adnapakajoŭki i za 180 USD
Jašče dva miesiacy tamu adšukać lubuju pa jakaści adnapakajovuju kvateru koštam mienš za 200–220 dołaraŭ było niemahčyma. Popyt na maleńkija kvatery byŭ stabilnym, a časam zvyčajnyja standartnyja adnapakajoŭki zdavalisia i za 230–250 dołaraŭ navat u dalokich rajonach.
Pavodle infarmacyi ahienta pa apieracyjach z žyllovaj nieruchomaściu ahienctva nieruchomaści «Dzinas» Iny Kulšy, standartnyja adnapakajovyja kvatery z meblaj, ale biez bytavoj techniki ŭ Zavodskim rajonie i Šabanach mahčyma źniać užo za 170–180 dołaraŭ. Siońnia realny košt arendy standartnych adnapakajovak u mikrarajonach vahajecca ŭ miežach 200–220 dołaraŭ, a siaredni košt takich kvater navat uzdoŭž linii mietro — nie bolš za 230–250 dołaraŭ.
Naša surazmoŭca ŭpeŭniena, što nievialikaje patańnieńnie vyklikana nie pavieličeńniem prapanovy, a chutčej pamianšeńniem popytu. Mienavita ŭviesnu raniej novymi klijentami ahienctvaŭ byli maładyja siemji, jakija vyrašali pažyć asobna ad baćkoŭ na zdymnych kvaterach. Razam z tym, kab siońnia rašycca na taki surjozny krok, maładyja ludzi pavinny mieć najaŭnuju valutu na 2–3 miesiacy płaty za arendu abo mahčymaść dołary abmieńvać ci zarablać. Voś tut isnuje prablema, kali jość nacyjanalnyja hrošy, a valuty niama. Kali valuty niama ŭ abmieńnikach, tady treba raźličvacca rublami, adnak siońnia nichto dakładna nie viedaje, pa jakim kursie ažyćciaŭlać takija raźliki. Na bujnych spažyvieckich rynkach dołar pamiž svaimi kaštuje niedzie 3600–3800 rubloŭ, a voś na rynku arendy žylla asobnyja haspadary kvater mohuć prapanoŭvać ličyć jaho za 4000 rubloŭ i navat daražej.
Sapraŭdnaje patańnieńnie adbudziecca praz 2–3 miesiacy?
Siońnia masavaha patańnieńnia ŭsich typaŭ kvater na rynku arendy jašče niama. Macniej za ŭsio ciapier patańnieła tolki zusim niajakasnaje žyllo, popyt na jakoje i da hetaha času byŭ minimalny. Razam z tym, u ahienctvach nieruchomaści isnujuć zajaŭki ad klijentaŭ na kvatery ŭzdoŭž mietro i na prastornyja adnapakajoŭki z sučasnaj płaniroŭkaj u novabudoŭlach pa košcie da 250 dołaraŭ. A voś jakasnych kvater u novabudoŭlach siońnia i nie chapaje. Na surjoznyja źnižki haspadary likvidnych kvater pakul nie zhadžajucca. Haspadary kvater i kvataranty čakajuć ciapier vyśviatleńnia situacyi vakoł valuty: naprykład, pa jakim košcie i kali dołary realna źjaviacca ŭ abmieńnikach. Kali i praź miesiac valuty ŭ abmieńnikach budzie nie chapać, tady peŭnaja častka kvatarantaŭ pačnie admaŭlacca ad zdymnaha žylla, abo raźliki buduć ažyćciaŭlacca vyklučna ŭ rublach. U vyniku kančatkovy košt arendy kvater vyznačycca vyklučna rynačnym mietadam, praź miechanizm popytu i prapanovy. Ina Kulša ŭpeŭniena, što i praź miesiac, i letam likvidnyja adnapakajovyja kvatery tańniej čym za 180–200 dołaraŭ prapanoŭvacca ŭ Minsku nie buduć.
Miž inšym, jana taksama adznačaje, što ciapier uvohule źnik popyt na darahija elitnyja kvatery, košt jakich pačynajecca z 500–600 dołaraŭ. Žyllo takoha kłasa siońnia čakaje lepšych časoŭ i staić pustoje.
