Ciońnia ŭ aficyjnym drukavanym orhanie Administracyi prezydenta hazecie «Sovietskaja Biełorusija» źjaviŭsia kamentar na temu ekspartnaha myta na naftu dla Biełarusi, što ad nastupnaha hodu ŭvodzić Rasieja. Artykuł Uładzimiera Samachvałava nosić zahałovak «Nafta pachnie hrašyma».
Aŭtar pačynaje z apelacyi da padpisanaj u 1999 hodzie damovy ab sajuznaj dziaržavie i ab supolnaj mytnaj prastory. Padpisany Michaiłam Fradkovym dakument nakont mytaŭ «SB» nazyvaje «parušeńniem pryncypaŭ uzajemnaha handlu».
«SB» prahnazuje naleta pavyšeńnie koštaŭ na benzyn, a taksama karekciroŭku ŭ suviazi z hetymi abstavinami biudžetu-2007. Adnak kamentatar supakojvaje: «Na ŭzrovień žyćcia ŭ Biełarusi heta asabliva nie paŭpłyvaje». Uvohule, čałavieku, jaki nie čytaŭ niezaležnych ŚMI, z artykułu ŭ "SB" niemahčyma zrazumieć, jakoje kankretna rašeńnie pryniała Rasieja, jakija pryčyny joju ruchali i jakija kankretna sumy stracić biudžet. (Jak viadoma, "Kommiersant" aceńvaje budučyja straty biełaruskaha biudžetu na 1,7-2 młrd dalaraŭ, a ekanamisty prahnazujuć devalvacyju biełaruskaha rubla ŭ vyniku hetaha).
Z artykułu vynikaje, što biełaruski bok jašče razhladaje varyjant, što Rasieja adklikaje svajo rašeńnie. Bo zaraz akurat viaducca pieramovy, kab «dasiahnuć kampramisnaha rašeńnia».
Mahčyma, my staniem śviedkami novych aktaŭ kapitulacyi i zdačy Rasiei novych elementaŭ nacyjanalnaha suverenitetu Biełarusi, naprykład, stvareńnia sajuznaha parlamentu ci pieradačy 50% "Biełtranshazu".
Kali ž myty nia buduć źniatyja, biełarusy pahražajuć krokami ŭ adkaz. Zachady Rasiei, jak kaža ŭ "SB" nikomu raniej nie viadomy parlamentar Anatol Paŭłovič, «mohuć značna ŭskładnić budaŭnictva sajuznaj dziaržavy». Taksama Paŭłovič pačynaje havaryć, što ŭ vypadku padaražańnia rasiejskich enerhanośbitaŭ «urad pačnie pošuki novych krynicaŭ papaŭnieńnia biudžetu».
Cikava, što składanyja "pošuki novych krynicaŭ" uskładajucca na ŭrad, nie na prezydenta — viernaja prykmiet taho, što pośpiech nie harantavany.
U apošnich skazach aŭtar artykułu hanić pazycyju ZŠA, jakaja zaścierahła Rasieju ad vykarystańnia enerhanośbitaŭ u jakaści sposabu cisku ("chočuć pałavić rybku ŭ mutnaj vadzie"). Tym samym uskosna zaviaraje Rasieju, što nijakaj narmalizacyi adnosinaŭ z Zachadam nie planujecca.
