Sustrakajučysia z rektarami, Alaksandar Łukašenka miž słovam zajaviŭ: nienarmalnaja sytuacyja, kali ŭ asobnych himnazijach praktykujuć adzin urok biełaruskaj movy ŭ tydzień i šeść urokaŭ anhielskaj. «Anhielskuju movu treba viedać, ale treba viedać i svaju rodnuju movu», – dadaŭ jon.
Jon zabyŭsia skazać, što «adzin urok biełaruskaj movy» – vynik metaskiravanaj palityki, jakaja pravodziłasia dvanaccać hadoŭ. Byli admienienyja adno za adnym usie pravy movy. Najlepšym biełaruskamoŭnym muzykam zabaroniena vystupać, imiony najlepšych biełaruskamoŭnych piśmieńnikaŭ zabaroniena ŭzhadvać na TV. «Senatar» nazyvaje ŭbludkami školnikaŭ, jakija navažylisia ŭźniać hołas u abaronu vykładańnia historyi Biełarusi pa-biełarusku, i zastajecca pry hetym davieranym siabrom prezydenta. Zabaraniŭšy niezaležnaje radyjo i TV na biełaruskaj movie, ideolahi stajać ź piatloju kala apošnich hazetaŭ i časopisaŭ. U łukašenkaŭskaj Biełarusi začyniena bolej biełaruskamoŭnych ŚMI, čym za ŭsiu papiaredniuju historyju krainy, z carskimi i sanacyjnymi časami ŭklučna! Pra takuju «drabiazu», jak spynieńnie dublažu multfilmaŭ na movie, u hetym pieraliku i ŭspaminać soramna. Multyki pierakładaje tolki klataja-pieraklataja «apazycyja». I paśla hetaha šukać vinavatych u tym, što dzieci nie razumiejuć maŭleńnia i čytać pa-biełarusku nia ŭmiejuć?..
Biełaruskaja mova tady stanie roŭnaju miž roŭnych, kali na joj stanuć havaryć prezydent i ministry. Pakul ža biełaruskamoŭnych zabaroniena prymać na dziaržaŭnuju słužbu, pakul u krainie padtrymoŭvajecca kulturny aparteid, takija zajavy vyklikajuć tolki kryvuju ŭśmiešku.
