Viadomaja spartoŭka Natalla Aŭsiejenka vykupałasia aholenaj u kampanij dźviuch białuch, skoknuŭšy ŭ pałonku ŭ Biełym mory. Čempijonka pa frydajvinhu pabiła čarhovy rekord: jana prabyła ŭ ledzianoj vadzie 10 chvilin i 40 siekund (zvyčajnamu čałavieku budzie dastatkova i piaci chvilin, kab zamierznuć da śmierci).
36-hadovaja Aŭsiejenka kaža: «Ja z malenstva maryła papłavać ź białuchami. Pad vadoj, viadoma, uvachodziš u asablivy stan alfa-rytmu — heta čymści padobna da hłybokaj miedytacyi. Žyvioły adčuvajuć heta, u mory ja ŭvieś čas sutykajusia z roznymi nasielnikami, ale białuchi — heta asablivy vypadak».
Dla znosin ź białuchami Natalli pryjšłosia pajści na krajnija miery. Sprava ŭ tym, što sysuny ŭsprymajuć dotyk tolki niepasredna sa skuraj — vopratka pieraškadžaje kantaktu. Plus, jak padzialiłasia daśviedčany frydajvier, białuchi vielmi ŭraźlivyja i adčuvalnyja. «Treba było całkam rastvaryć u sabie čałavieka, zrabicca takoj ža ŭraźlivaj i adkrytaj — Palarny kruh, choład, biez hidrakaściuma».
Lekary papiaredzili: nieviadoma, jak paviadzie siabie arhanizm — možna navat aślepnuć, bo ŭ takoj chałodnaj vadzie chutčej za ŭsio zamiarzajuć vočy.
Aŭsiejenka kaža: «Tvar pačynaje hareć adrazu, ale chutka pryvykaje. Samaje składanaje — heta vočy i patylica. Takoje adčuvańnie, što ty pastajanna płačaš. Potym rassłablacca, abvykaješ, pačynaješ dychać».
Uvieś ekśpierymient i padrychtoŭku da jaho zdymali prafiesijnyja režysiory i padvodnyja apieratary. Da pajezdki na Biełaje mora ŭsia zdymačnaja hrupa doŭha treniravałasia na Ŭrale. Videaapieratary, scenarysty, režysiory ŭ terminovym paradku vyvučali techniku padlodnaha apuskańnia. Sama Natalla Aŭsiejenka buduje svaju škołu frydajvinhu na sakretach johi.
Natalla Aŭsiejenka — rekardsmienka śvietu, uvachodzić u piaciorku najmacniejšych spartovak.
