U Vilni zaviaršylisia mierapryjemstvy mižuradavaj mižnarodnaj arhanizacyi «Supolnaść demakratyj», jakaja abjadnoŭvaje bolš jak 100 krain śvietu.
U časie kanfierencyi dziaržsakratarka ZŠA Hiłary Klintan zajaviła, što biełaruski režym pavinien vyzvalić palitźniavolenych: «My ŭsie razam patrabujem, kab Biełaruś vyzvaliła palityčnych viaźniaŭ i pačała demakratyčnyja reformy. Sumna, što stanovišča žycharoŭ Biełarusi tak adroźnivajecca ad situacyi ŭ ich susiedziaŭ. Heta nahadvaje nam, što stvareńnie svabodnaj Jeŭropy jašče nie zavieršanaje».
U časie kanfierencyi biełaruskuju apazicyju ŭznaharodzili premijaj imia Branisłava Hieremka (Geremek Award), byłoha ministra zamiežnych spraŭ Polščy, adnaho z zasnavalnikaŭ Supolnaści demakratyj.
Ad imia apazicyi premiju pryniaŭ Uładzimier Niaklajeŭ.
Pierad cyrymonijaj kiraŭnik dypłamatyčnaha viedamstva Litvy Aŭdronius Ažubalis skazaŭ: «Niama adnaznačnaha adkazu, jak dziejničać najbolš efiektyŭna, padtrymlivajučy apazicyju, i trymacca suvernitetu. Ale heta nie aznačaje, što my pavinny pierastać sprabavać roznyja sposaby vyzvaleńnia ludziej Biełarusi ad dyktatury».
U Vilni prysutničali taksama pieršy staršynia Viarchoŭnaha Savieta niezaležnaj Biełarusi Stanisłaŭ Šuškievič, były kiraŭnik Nacbanka Stanisłaŭ Bahdankievič, mama źnikłaha žurnalista Źmitra Zavadskaha, adzin z kiraŭnikoŭ kampanii «Havary praŭdu» Andrej Dźmitryjeŭ, zubroviec Jaŭhien Afnahiel.
Imprezy i sustrečy forumu prachodzili ciaham niekalkich dzion.
Uładzimier Niaklajeŭ adznačyŭ: «Takija mierapryjemstvy davoli biurakratyčnyja ŭ svajoj pabudovie, ale jany dajuć mahčymaść kułuarnych pieramovaŭ z tymi ludźmi, ź jakimi ciažkavata spatkacca prosta na vulicy. I my hetyja pieramovy praviali — ź ministrami zamiežnych spravaŭ Šviecyi i Niderłandaŭ, i jašče niekalkimi značnymi asobami, jakija vyrašajuć siońnia jeŭrapiejskuju i suśvietnuju mižnarodnuju palityku. Čym jašče dla mianie admietny hety vysokaha ŭzroŭniu forum, tak heta tym, što pytańnie Biełarusi tut nie niejkaje šarahovaje, u siaredzinie śpisu ci pad jahony kaniec, a na samym viersie». Pra heta śviedčać i toje, što kazała Chiłary Klintan hetymi dniami adnosna Biełarusi, dadaŭ Uładzimier Niaklajeŭ.