Lider Abjadnanych demakratyčnych siłaŭ Biełarusi Alaksandar Milinkievič daŭ acenku chodu palityčnaj kampanii «miascovyja vybary» i padrychtoŭcy čarhovaha Kanhresu demakratyčnych siłaŭ.
Na dumku Alaksandra Milinkieviča, «lubyja zajavy siońnia kiraŭnikoŭ palityčnych partyj ab źniaćci demakratyčnych kandydataŭ śviedčać pra niaŭpeŭnienaść u siłach hetych kiraŭnikoŭ, jakija tak i nia zdoleli arhanizavać šyroka razreklamavanaj ahulnanacyjanalnaj palityčnaj kampanii «Miascovyja vybary».
— Na bolš jak 24 tysiačy akruhaŭ apazycyjnyja palityčnyja partyi vystavili razam mienš za 1000 kandydataŭ, ale j hetaja ličba, pavodle źviestak infarmavanych ludziej, zavyšanaja ledź nia ŭ dva razy. U niekatorych vypadkach navat viadučyja palityki, sprabujučy zarehistravacca, nie zmahli farmalna vykanać elementarnyja patrabavańni zakanadaŭstva.
Skłałasia ŭražańnie, što lidery partyj nia viedali, u jakich umovach daviadziecca pravodzić vybarčuju kampaniju. Razmovy pra toje, što ŭłady nie drukujuć ulotak, zabaraniajuć sustrečy, hučać niepierakanaŭča. My [Ruch "Za Svabodu" -- Red.] dziejničali pavodle schiemy: padavaj zajaŭku, źviartajsia da ŭładaŭ, nie dazvalajuć -- šukaj mahčymaści i pravodź sustrečy.
Siońnia kanstatuju, što palityčnuju kampaniju «Miascovyja vybary» možna nazvać niaŭdałaj. Našy prapanovy – adzinaja palityčnaja kampanija, adna kamanda, adno pasłańnie, adzin scenar – nie byli padtrymanyja. Tamu chto jak chacieŭ, tak u vybarach i ŭdzielničaŭ.
U hetych umovach my vymušanyja byli zrabić toje, što mahčyma – źbirali podpisy, sustrakalisia z vybarcami, demakratyčnym aktyvam u 26 haradach Biełarusi. Da dnia vybaraŭ papracujem jašče ŭ 15 nasielenych punktach. Treba da kanca vykarystać usie mahčymaści dla infarmavańnia ludziej i tolki paśla prymać rašeńnie, zdymać ci nie zdymać kandydataŭ, — adznačyŭ Alaksandar Milinkievič.
Aceńvajučy padrychtoŭku demakratyčnych sił da Kanhresu, Milinkievič źviarnuŭ uvahu na nievykanańnie pahadnieńnia, padpisanaha palityčnymi partyjami i zaćvierdžanaha Palityčnaj radaj:
— Pahadnieńnie ab praviadzieńni Kanhresu, padpisanaje kiraŭnikami palityčnych partyj i zaćvierdžanaje Palityčnaj Radaj, nie vykonvajecca pa pryncypovych pytańniach. Heta padryvaje davier jak da Palitrady, tak i da samoha Kanhresu. Siońnia niekatoryja partyi nazyvajuć astranamičnyja ličby svaich vyłučencaŭ na Kanhres. Žurnalisty pačynajuć vyśviatlać -- akazvajecca, što sapraŭdnyja ličby ŭ dziasiatki razoŭ mienšyja.
Tamu padrychtoŭku da Kanhresu pakul možna ličyć niezdavalniajučaj. I samaje kiepskaje, što šerah kiraŭnikoŭ partyj nie demanstruje voli źmianić sytuacyju ŭ lepšy bok, — miarkuje lider Abjadnanych demakratyčnych siłaŭ Alaksandar Milinkievič.
